KHAWTHLIR
LRM-in thisen pe
LRM Hospital chuan an damdawi-in kum nga tlin lawm nan nimin khan LRM Hospital hall-ah thisen pek an huaihawt a, Civil Hospital, Aizawl Blood Bank tan thisen unit 42 an pe a, petute mipa 25 leh hmeichhia 17 an ni. Hospital director V Lalduhawma sawi danin, LRM Hospital hi September 1, 2017-ah din a ni a, damlo khum 96 awmin, thawktu mi 300 vel an awm mek a ni.
Kawng khâr dawn
Aizawl Traffic Additional SP chuan, vawiin leh naktukah PWD-in Zarkawt leh Dawrpui Vengthar inkar kawngpuia tui luankawr an siam mekah kawng tan tlanga hna thawh a nih dawn avangin kawng khâr a ni dawn tih a tarlang.
Beihrual thla
September thla hi Beihrual thla a ni a, Mizorama kohhran hrang hrangte'n nizan khan an hmang ṭan. Mizorama kohhran lian ber, Presbyterian Kohhran chuan September 1-4 chhungin Ramthar Hapta an hmang dawn a, September 5-18 chhungin 'Kraws thu' an zir ang a, September 19-25 chhungin 'Kristian chhungkaw hapta' an hmang bawk ang. Beihrual hi June 1918-ah hman ṭan a ni a, kum 1925 aṭangin September thlaah neih ṭhin a ni.
Kawng siam dawn
September 4, 2022 khian PWD-in Chanmari leh Chaltlang Dawrkawn inkar kawng an thawm ṭha dawn. Hei vang hian Chanmari aṭanga Chaltlang lam pan tur lirthei chiah kal theih a ni dawn a, Chaltlang aṭanga Chanmari lam panin kal theih a ni dawn lo tih Traffic SP Rodingliana Chawngthu chuan a tarlang.
Pu Buanga Award
Mizo Academy of Letters Joint Hqrs, Lungleiin thu leh hlaa sûlhnu nei ṭha leh chawimawi tlakte hnena an hlan ṭhin, Pu Buanga Award dawng tur an thlan mekah mi panga an thlang chhuak tawh a, mi panga aṭangin Award dawng tur thlan chhuah a ni ang. Mi pangate chu - C Chhuanvawra, Dr Lalzuia Colney, J Malsawma, Lalrammawia Ngente leh Prof. RL Thanmawia te an ni.
Police-in silai man
Vaivakawn police-te chuan August 30, 2022 khan Hunthar Venga Lalboi Filling Station pump bulah .22 calibre (tualchher) pistol pathum, pistol remkhawm loh pakhat leh a magazine an man. Silai kawltu pahnih - Ramdinthara (26) s/o H Lalthlengliana, Damveng leh Lalremruati (26) d/o Tlangsawiruala, Tuikual South-te an man bawk.
LS MP-in tlawh
Lok Sabha MP C Lalrosanga, DoNER Ministry Consultative Committee member ni bawk chuan nimin khan North Eastern Indira Gandhi Regional Institute of Health Medical Sciences (NEIGRIHMS) a tlawh, MP chuan, NEIGRIHMS chu Natonal Institute of Importance a puan a nih a beisei thu leh theihtawpa hmalakpui a tum thu a sawi.
Auditorium hawng
Lawngtlai East bialtu MLA H Biakzaua chuan nimin khan Lawngtlai III-ah Lai Cultural Centre-cum-Auditorium a hawng. LCCA hi Lushai Engineers, Aizawl-te'n North Eastern Council (NEC) aṭanga sum hmuh nuai 466.62 hmanga an sak a ni. Hawnnaah hian LADC chief executive member V Zirsanga, chairman VL Hmuaka, executive member leh MDC te, Art & Culture director R Hmingthanzuala leh sorkar official-te an tel.
Ran chaw siamna hawng
Mamit bialtu MLA H Lalzirliana chuan nimin khan Mamit Piggery Cooperative Society leh Cooperative department-te buatsaih vawk chaw leh ran chaw siamna hmun a hawng. Mamit Piggery Cooperative Society puih nan Rs 1,00,000 a pe nghal a ni.
Bawrhsapin tlawh
Lunglei bawrhsap Kulothungan A chuan nimin khan Lunglei Ramthar Venga Kendriya Vidyalaya sak mek a tlawh a, hnathawktute chu harsatna an neihte a hnena thlen turin a chah. Kendriya Vidyalaya hi MAMCO bultumin cheng nuai 2,385.37 hmangin sak mek a ni.
Ṭanpuina dawng tur thlifim
Champhai District Committee on National Social Assistance Programme - National Family Benefit Scheme (NFBS) chu nimin khan an chairman James Lalrinchhan, bawrhsap hoin an ṭhukhawm. Ṭhutkhawmah hian NFBS hnuaia BPL chhungkuaa eizawngtu ber a thiha ṭanpuina dawng tura dilna lut 33 an zir chiang a; Champhai district-in hamṭhatna dawng tur quota a neih 27 milin mi 26 an thlang a, thuneitu sang zawkah sawifiahna siama dilna siamsak tur pakhat an rawt bawk.