Ruihhlo zir chianna bu tlangzarh a ni ; Ruihhlo mante bihchian a ngai - CM

Social Welfare department-in Mizorama ruihhlo ti ṭhinte dinhmun zirchianna, 'Baseline Survey Report on the Extent and pattern of Drug use in Mizoram,' tih an buatsaih chu nimin khan Assembly Annexe conference hall-ah chief minister Lal Thanhawla'n a tlangzarh. Chief Minister chuan, ruihhlo chu a mantute aṭanga tihchingpen a awm leh awm loh bihchian a ngaih thu a sawi.

CM Lal Thanhawla chuan, Mizorama ruihhlo hâl ṭhinah ruihhlo tak tak hâl a nih leh nih loh chian a ngaih thu sawiin, "YMA-in an hâlte hi chu kan ringhlel lo a. Sorkar bawk hi enfiah a ngai a, kan hotu liante'n an naute an ven ṭhat a ngai," a ti a; ruihhlo chu a mantute aṭanga tihchingpen a awm leh awm loh bihchian a ngaih thu a sawi a ni.

Lal Thanhawla chuan, ruihhlo chu Mizo ṭhalai tam takin an chhiatpui tih sawiin, a donaah mimal, pawl leh kohhrante chu a thawh hlâwk ber nih tum turin a fuih a, "Ruihhlo hi kan hmelma lian ber pakhat a ni tih hria a, theihpatawpa kan ṭan tlan a ngai a, sorkar, kohhran leh pawlte kan ṭan rual a ngai a ni," a ti.

Chief Minister chuan, ruihhlo ti ṭhinte enkawlna hmunte chu sawisel ringawt lo a, ṭanpui zawnga hmalak a ṭul thu a sawi a; khawchhak lam aṭanga ruihhlo tawlhtute chunga hmalak dan tur thuneitute'n an ngaihtuah mek tih sawiin, "A ṭul phawt chuan Chin Hills Chief Minister leh Chin Hills-a kan Mizo unaute thawhpui an ni ang," a ti bawk.

Social Welfare minister PC Lalthanliana chuan, ruihhloin mi zawng zawng a tibuai thei tih sawiin, "Ruihlo hian kan chhungkua a tibuai rih lo a ni mai thei a, kan kawngkaah erawh a ding reng a, a luhchilh theih reng kan ni," a ti a; ruihhlo laka invenna tura hmalak chu sorkar tih tur bik a ni lo a, kohhran, sorkar, tlawmngai pawlte leh mi tin mawh a nih thu a sawi.

Baseline Survey on the Extent and pattern of Drug use in Mizoram hi ruihhlo ti ṭhinte zingah leh jail-ah neih a ni a, district pariat tuam kim niin, ruihhlo chi hrang hrang ti ṭhin mi 2,633 thu zawh an ni. Thu zawhfiah zinga 2,353 chu mipa niin, 265 chu hmeichhia an ni a, nihna inthlak (trans gender) mi 11 an tel.

Ruihhlo ti ṭhin zawhna an zawhte zinga mi 1,091 (41.4%) chu middle school chiah zo an ni a, mi 954 (36.2%) chu higher secondary zo niin, mi 273 (10.4%) chu graduate an ni. A tam zawk, 2,149 chu hna thawh nei mumal lo an ni a; mi 635 chu nupui/pasal ṭhen tawh an ni.

Zawhna chhangtu mi 2,633 zinga 2,527 chuan vawi khat tal vaihlo an ti tawh a, mi 2,387 chu zu in tel tawh niin, mi 1,490 chu ganja (cannabis) ti tel tawh an ni. Mi 2,633 zinga 65.8% chuan heroin an khawih a, 69.8%-in damdawi ruih theih an khawih. Cocaine khawih ṭhin 65 leh ruihhlo dang khawih an awm bawk.

Mi 2,633 zinga 2,064 (78.4%) chu vawi khat tal inchiu tawh an ni a, inchiu tawh mi 2,064 zinga 500 (24.1%) chuan mi hman hnu hriau (syringe) an hmang ṭhin a; chutih laiin, mi 1,357 chu an inchiunaah vawi khat tal mi hriau hman ṭâwm tawh an ni a, mi 1,122 chuan anmahni pual bikin syringe an nei lo tih an sawi.

Mi 2,633 zinga 1,174 (44.6%) chu ruihhlo vanga vawi khat tal man tâwk tawh an ni. Man tawk tawh 1,174 zinga 639 (54.4%) chu ruihhlo tih vanga man an ni a, mi 98 (8.3%) chu ruihhlo kawl vanga man niin, mi 141 (12%) chu ruihhlo zawrh/hralh vanga man an ni thung.

Ruihhlo ti mi 2,633 zinga 1,573 (59.7%) chu enkawlna dawng tawh an ni. Champhai district-ah enkawlna dawng tawh 89.2%, Lunglei district-ah 79.7% leh Aizawl district-ah 69.2% an awm laiin, Mamit district-a 65.6% leh Serchhip district-a 72.8% chuan enkawlna an la dawng ngai lo. Mi 2,633 zinga 562 (21.3%) chuan an overdose tawh tih an sawi.

Zawhna chhangtu mi 2,633 zinga mi 34 (1.3%) chuan thla ruk kal ta chhungin an anpui (same sex) an kawp a; mi 1,290 chuan ruihhlo an tihna lamah mi kut an tuar tawh tih an sawi bawk.