Mountain Development Summit Aizawlin a thleng dawn

Mizoram Sustainable Development Foundation (MSDF) hruaitute chuan nimin khan Aizawl Press Club-ah thu­thar thehdarh-tute an kâwm a; India rama Hima­laya tlang bulṭhut (Indian Himalayan Re­gion) state 12-te puala intawhkhawmna, Sustain­table Mountain Develop­ment Summit vawi 6-na Aizawla nghah tur an sawifiah.

Organising Commi­ttee secretary Dr. Lal­biakmawia Ngente sawi danin, Summit hi hmun hrang hrangah neih ṭhin a ni a, kum 2016 khan Leh, Ladakh-ah nghah a ni.

Summit hi state 12-te puala pawl din, Integrated Mountain Initiative (IMI) buatsaih a ni a, September 20-22, 2017 chhungin Mizoram University-ah neih a ni ang. India ram hmun hrang hrang leh ram páwn aṭangin mikhual 150 chuang tel tura beisei a ni.

Summit thlen tur chung­changah hian Organising Committee chairman Zodintluanga, Sports and Youth Ser­vices minister hoin August 4, 2017 khan a pisa­ah inpuahchahna leh hmalaknate thlirho a ni tawh. Summit thupui tur chu 'Climate Change' leh 'Sustainable Mountain Cities' tih a ni a, thupui sawi tur hian khawvel leh India rama mithiam leh lârte sâwm an ni.

Mountain Summit thlen tur pual hian 6th. Indian Himalayan Pho­tography Competition leh 1st. Young Mountain Filmmakers Competition-te buatsaih a ni dawn a; ṭhalaite pualin Youth Summit buatsaih a ni bawk ang.