Khualzin hîp tura hmalak dan Larsap hrilh

Indian Golf Union president Wing. Comman­der (Rtd.) Satish Apa­rajit leh Leading Edge Adventures hotu Capt. Satish Pathania chuan, nimin khan Raj Bhavan-ah Governor Lt.Gen. Nirbhay Sharma an kâwm a; khualzinmite Mizorama hîp tura an hnathawhte an hrilh.

Governor chuan, sik leh sa dinhmunin a zir avang leh ram rálmuang leh mawi a nih avangin Mizoram chu danglam bikna nei, khualzin mite tlawhpawh hmun lâr tak ni tura a duh thu a sawi a, "India ram aṭang mai ni lo, Asia chhimchhak ram aṭangte pawha khualzin mi hîp thei tur ruhrel changtlung tak neih a pawimawh. Mizo mipui tan pawh ei leh bara hmasawnna thlentu a ni thei dawn a ni," a ti.

Capt. Satish Pathania chuan Swadesh Darshan, Ministry of Tourism hnuaia Eco-Adventure Circuit an ruahman dan leh hma an lak mek dante a sawi a; India rama skywalk hmasa ber leh Asia khawmual-puia ropeway thui ber Aizawlah siam a nih tur thu Larsap a hrilh a ni.