Kolasib-ah internet hmanga tui bill pek theih

Kolasib mipui tana internet hmanga tui bill pek theihna tur, 'Online Bill Payment' chu nimin khan mipui hman theih turin Kolasib DC Dr Arun T-a'n DC conference hall-ah a tlangzarh.

Dr Arun T chuan, Aizawl tih loah chuan Kola­sib chu district zinga online payment hmang hmasa ber tur a nih thu a sawi a, "Tui bill pe turin tha sên hah ngai loin, mahni in chhung aṭangin awlsam takin a pek theih tawh dawn a ni. Mipuite'n a awlsam zawkna hrethiama ṭangkai taka an hman a pawimawh," a ti.

Online bill payment hmanga tui bill pe duhte chuan https://phebilling.mizoram.gov... ah lutin, district-ah Kolasib thlangin consumer number chhut luha tui bill pek theih a ni tawh ang. Tui bill pe tih chhin­chhiahna (receipt) chu email chhut luhah thawn ṭhin tur a ni.

Net banking hmang-tute chuan tui bill Rs. 500 chin hnuai lamah chuan transaction tinah service tax (gateway fee) Rs. 5 an chawi ang a, Rs. 500 aia tamah chuan Rs. 7 an chawi thung ang. Credit card hmangtute chuan transaction pakhatah an bill pek zat aṭanga 1% service tax an chawi a ngai thung.

Debit card hmangtute chuan tui bill Rs. 2,000 chin hnuai lamah transac­tion tinah 0.75% service tax an chawi dawn a, Rs. 2,000 aia sangah 1% chawi tur a ni.

Mobile wallet hmang-tute chuan transaction tinah service tax Rs. 5 an chawi dawn. Transaction fee (gateway fee) chawi aṭang hian GST 18% pek tur a ni bawk.