TBCC chhuak mi 3 OD-in thi - MDFC

Mizoram De-Addiction Coordination Forum (MDFC) chuan thuchhuah siam­in, tun hnaia Ṭawngṭai Bethel Camping Centre (ṬBCC) aṭanga inla chhuak zinga mi pathum chu over­dose vangin an thi niin an tarlang a, pawi an tih thu leh thi chhungte an tawrhpui thu an sawi.

MDFC chuan August 7, Thawhṭanni khan ṬBCC chu an tlawh tih sawiin, "ṬBCC hian thil ṭha tih tam tak an neih bakah, tih sual pawh an neih ngei kan ring a. Insiamṭhat tumin nasa takin ṭan an la a, hmasawn zel tur kan nih angin, huai­sen taka an insiamṭha ngam hi rawngbawltu tih tur dik takah kan ngai," an ti.

Nu leh pa enkawl bei­dawn tawhte'n beiseina nen an pan ṭhin de-addic­tion centre-te chu chhawm­dawl an ngai hle tih sawiin, MDFC chuan, "Pawl leh mimal inphalte ṭanpuina nen kum tam tak kan kal ve ṭâwk ṭâwk a ni," an ti a; ruihhloin ṭha­laite a tihbuai nasat avangin chhungkua leh khaw­tlangin an buai-pui a, ruihhlo ngaite chu ngaihsak leh chhawmdâwl an ngaih tak zet thu an sawi.

MDFC chuan, ruihhlo ti an tlakhniam theih nan leh a ti ṭhinte enkawl kawngah nasa taka ṭan lak a ṭul thu sawiin, "Kan sorkar hian ṭhalaite leh khawtlang harsatna hre­thiam a, tuna home 29 awmte hi tihchangtlun leh chhawmdawl an ngaihna laiah ṭanpui a, a ṭul anga Mizoram budget-ah sum dah turin kan ngen tak meuh a ni," an ti.