KHAWTHLIR
EDS hrilhfiah
NEDP péng pakhat, Entreprenuership Development Scheme (EDS) hnuaia hmalakna inzirtirna leh Business Plan Contest 2017 kalpui mek chanchin inhrilhfiahna hun, nimin khan Serchhip DC pisa conference hall-ah buatsaih a ni a; zirlai, sumdawng, khawtlang hruaitu leh sorkar official-te an tel.
Thisen pe
Sateek Bial KṬP chuan nimin khan Sateek Kohhran Hall-ah blood donation camp an huaihawt a, Synod Hospital tan mipa 56 leh hmeichhia pakhatte'n thisen unit 57 an pe.
Award dil theih
Pianphunga rualbanlo (Persons with Disabilities)-te chawikânna tura hma latute hnenah National Awards for the Empowerment of Persons with Disabilities, 2017 pek a ni dawn a, a dil duh tan August 15, 2017 ral hmain www.disabilityaffairs.gov.in ah dilna thehluh theih a ni.
Loan bithliah
Apex Bank Ltd. State Level Technical Group Committee chu Thawhṭanni khan an head office, Tuikual South-ah an ṭhukhawm a, kum 2017-18 chhunga Mizoram bank hrang hrangten Short Term Agriculture Loan, thlai chi hrang hrang chinna atana hman tur pek dan tur chungchang an ngaihtuah a, thlai chinna loan diltute ram zau zawng a zira loan pek theih zat an bithliah nghal.
Rulhut do sawiho
Thawhṭanni khan Lawngtlai District Level Coordination Committee on National Deworming Day chu addl. DC H Dolianbuaia hoin a pisa-ah an ṭhukhawm a, an district chhunga rulhut do beihpui thlak dan tur an sawiho.
Kutthlak dem
All Mizoram Village Council Association chuan thuchhuah siamin, July 30, 2107 zana Kawlhawk V/C president Lalfingpuia Ralte kutthlak a ni chu thinrimthlak an tih thu an tarlang a; "Pu Lalfingpuia Ralte kutthlaktu Lalhriatpuia chungah dan rorelna dik tak hmanga hrem ngei turin thuneitute kan phût tlat a ni," an ti.