MNYF-in CM Hawla thusawi rapthlak ti

MNF ṭhalaite chuan nimin khan Mizo Hnam Rûnah an ṭhukhawm a, MNF president Zo­ramthanga'n a hmanpui. Resolution pass in, chief minister Lal Thanhawla'n, 'Kan party mi ni lo chu ka thisen zawmpui pawh ni se engah mah ka ngai lo,' a ti chu rapthlak an tih thu an tarlang.

Zoramthanga chuan, Mizote'n ram an nei a, a dawtah sakhua an nei a, a dawtah culture an nei leh tih sawiin, "Kan ram leh hnam leh kan sakhua humhimna ṭha ber leh a pal hungna ṭha ber chu nationalism a ni. Pathianin hnama min siamin ram min pe a, ṭawng min pe a, sakhua min pe a; chuta kan ral lohna turin nationalism hi a pawimawh hle," a ti.

MNF President chuan, "Ram dangin economic thal alh thei hmanga min kah chhiat lohna turin ṭhalaite a fatu tur in ni. NLUP an ti a, Rs. 30,000-te an sem a, an tlu zawih zawih a. Chumi do turin kan sorkar hunah lei chung leh lei hnuai hausakna kan la

chhuak ang a, economic development-ah Gujarat kan khûm dawn a ni," a ti a; industry tam tak din a nih tur thu leh chutah chuan ṭhalaite chu hlawhfa ni loin, hlawhfa chhawrtu nihtir an tum thu a sawi bawk.

MNYF Resolution ṭhenkhat
1. Mizoram kaihruai zel turin kan president Zoramthanga kan ring tawk a, a kaihhruaina hnuaiah 2018 inthlanah hnehna kan chan ngei kan ring.
2. Tun hnaia Mizorama chhiatna leh buaina thleng chi hrang hrangte hi Chief Minister-in kohhran a zah loh vang leh Congress party chhungkaw buaina vanga thleng ni-ah kan ngai.
3. CM Pu Lal Thanhawla'n, 'Kan party mi ni lo chu ka thisen zawmpui pawh ni se engahmah ka ngai lo' a ti hi a rapthlak kan ti a, Congress party ni lo Mizo mipui tam zawkte tan Congress kaihhruai sorkarah beisei tur a awm lohzia tilangtuah kan ngai.
4. CM Pu Lal Thanhawla'n, 'Lepse ka ngam' a tih hi a lepse theitute kut a phuar fel hnua mipui hmaa hmai phih tuma a inhrosakna mai niah kan ngai.