ZNP-in Chakma chungchangah Action Committee din an rawt

ZNP chuan thuchhuah siamin, Chakma chung­changah Action Committee din ni ni se an duh thu an tarlang.

Chakma chung­changah ZNP President-in political party hrang hrang leh NGO-te ṭan rual a ṭul thu a lo sawi tawh ṭhin tih tarlangin ZNP chuan, "July 1, 2017 pawh khan rawtna siamin, sorkar uap­na hnuaiah party leh NGO tinte thawhhona siam a, Action Committee din a lo rawt tawh a, tun thlenga din a la ni thei lo hi pawi kan ti tak zet," an ti a; Action Committee din a nih theih nan August 14, 2017-ah an ngaihtuah dawn thu an sawi.

ZNP chuan, Election Commission of India (ECI)-in January 1950 hnu lama Chakma Mizorama lutte chu electoral roll aṭanga paih a phal tih sawiin, "January 1950 hnu lama lo lutte chu hnawh chhuah vek ni rawh se. Village register fel taka siam ni se, lo lut rute mana ûm chhuah nghal zel a nih theih nan record fel tak vawn ni rawh se," an ti.

Chakma-te ram dik tak, Pathianin homeland atana a pek chu Bangladesh a ni tih sawiin ZNP chuan, "Bangladesh-ah MP te, minister-te pawh an nei reng a; UN Resolution hnuaiah zalenna sang zawk an sual mek bawk. An ramah hian zalen taka an awm kan duhsak a, kan ṭhenawm ṭha tak ni se tih hi kan duh a ni," an ti a; ṭhenawmte ram chhunga luh rûk leh chàm hlen erawh chu an remti ngai lo tih an tarlang bawk.