JICA hotute'n Chief Minister an kawm
Japan International Cooperation Agency (JICA) hotute chuan August 7, Thawhṭanni tlai khan chief minister Lal Thanhawla a pisaah an kâwm a; Mizoram sorkar nena an thawhhona chungchang an sawipui.
JICA chief representative Takema Sakumato chuan, Mizoram sorkar nen irrigation, horticulture leh agriculture kaihhnawihah hmanrua leh thlai/thei hralhna tur bitumin thawhhonna an nei ṭan tih a sawi a, "Hmalakna hmasa atan Champhai, Kolasib, Aizawl leh Serchhip district-ahte kalpui tum a ni," a ti.
Sorkar offfcial-te nen an inkawm tawh thu sawiin Takema Sakumato chuan, "JICA lam chu kan phûrin beiseina sang tak kan nei a ni," a ti a; agriculture sector-a thawhhonain hlawhtlinna a thlen a nih chuan kawngpui leh inkalpawhna hmalakna hrang hrangahte JICA chu tel chhunzawm a inhuam thu a sawi.
Chief Minister chuan, JICA hotute chu Mizoram tana an thilphalna leh an phûrnate avanga lawm thu hrilhin, "JICA leh Mizoram sorkar thawhonaah hnathawh timuangcháng zawnga hmalakna reng reng a awm thiang lo. Project entawn tlak siam a nih ngeina turin sorkarin hma a la ang," a ti.
Hetih lai hian, JICA chuan nimin khan Mizoram sorkar nena an thawh dunna hnuaia agriculture lama hmsawnna tura ruahman, 'Technical Cooperation Project' zirhona Administrative Training Institute (ATI) auditorium-ah an buatsaih.
Zirhona hawngtu Irrigation & Water Resources secretary H Lalengmawia chuan. Japan thiamna sang tak, khawvelah pawha a ber hauh phate'n an thiamna Mizoram sorkar hnathawkte hnena a thlâwna an hlân chhâwng tur chu vanneihthlak a tih thu a sawi a, "Mizoram ei leh bara hma a sawnna tur te, kawng dika mipui hruai turte leh ram hruaitute duh dana policy duan, a nihna ang taka hmang chhuak theitu chu sorkar hnathawkte hi an ni," a ti.