Mizorama ruihhlo ti ṭhinte enkawlna duh thu a sam lo

Social Welfare department bultumin nimin khan Aijal Club-ah ruihhlo ti ṭhinte mumal taka enkawl an nih theihna tura a enkawlna hmunin a mamawhte leh ṭul dangte sawihona, 'Consultation meeting on Accreditation of De-addiction Centres' buatsaih a ni. Mizorama ruihhlo ngaite enkawlna hmunte chu duhthusam a nih loh thu leh inkaihhruaina dan siam a ṭul thu an sawi hlawm.

Meeting-ah hian, Mizoramah pawl hrang hrangin ruihhlo ngaite enkawlna an kalpui mekah, duhthusama ṭha inenkawlna (standardized treatment) ṭha leh inenkawlna dan mumal tak (minimum standard of care) a awm loh thu leh, chumi avang chuan inenkawlna awmze nei a thlen loh ṭhin thu an sawi. "Hemi avang hian enkawlna mamawhtute leh damna kawng zawh mekte mamawh a phuhru tâwk ṭhin lo," tih a ni.

Mizorama ruihhlo ngaite enkawlna hmunte chu duhthusam a nih loh avangin, inkaihhruaina mumal tak duan (accredi­tation) a pawimawh thu sawi lan a ni a, "Accreditation-ah hian enfiah (inspection), vil zui (monitoring) leh endik(evaluation) a pawimawh hle," an ti a; minimum standard of care kalpui dan enfel tur mi bik ruat a, zirtir a ṭul thu leh accreditation leh enkawl zuina neih dan, enkawlna hmuna endikna buatsaihte a ṭul thu sawi a ni bawk.

Meeting hi Social Welfare additional secretary K Vanlalrawni'n a kaihruai a; Social Welfare secretary P Lalchhuanga, International Expert on Substance (Drugs) Abuse Debashis Mukherjee leh department hrang hrang aiawhte leh ruihhlo ngaite enkawltu pawl hrang hrang hruaitute an tel a ni.

Hetih lai hian, Mizoram sorkar chuan ruihhlo ngaite enkawlna hmun (home/ centre) kaihhnawihah dan hman lai a la nei lo a, dan an siam thar erawh hman theiha peih ṭêp a ni.

Social Welfare department hotute sawi danin, ruihhlo ngaite centre/home chungchanga dan an siam thar hi, 'The Mizoram Drugs (Control Substances) Act, 2016 a ni a; Rules an siam tawh chu Law & Judicial department pawmpui turin an thawn tawh. Law & Judicial department-in an pawmpui (vetted) hnuah Cabinet-in a pawm leh a la ngai a, Cabinet-in a pawm chuan government gazette-a chhuahin hman theih a ni ang.