MDF-te BJP-ah inchhung lut dawn

BJP, Mizoram Pradesh presi­dent Prof. JV Hluna chuan, nimin zing khan Lunglei Circuit House conference hall-ah thuthar theh­darhtute a kâwm a; Mara Demo­cratic Front (MDF)-te chu BJP-ah an inchhûng lut dawn a, inremna an siam tawh niin a sawi.

Prof. JVHluna chuan, MDF-te BJP-a an inchhûn luhna turin inremna mumal tak an siam tawh a, September 2017-ah Union Minister hoin Siaha-ah ropui takin inchhun luhna programme siam tum a nih thu a sawi a ni.

BJP chungchangah JV Hluna chuan, India rama mihring 70% vel chu BJP leh a thawhpuite lamṭang an nia sawiin, "Congress leh a thawhpuite lamṭang chu 8% chauh an ni tawh. Hei vang hian Mizo mipuite pawh Congress party lamṭanga an la awm tlat chu thil vanduaithlak tak a ni," a ti.

Prof. JV Hluna chuan, August 9 chu Quit India Movement kalpui ṭan ni a ni tih sawiin, Lung­lei district mipui chu India mi an nih anga an theihna záwn­ah India ram hmasawnna atan inhlân thar turin a sáwm.

Tun hnaia Chakma leh MZP chunga thil thleng chungchang chu BJP chuan a langin an sawi ve vak lo a, ngaihtuahna mumal tak an sêng nia sawiin JV Hluna chuan, "Nakkuma MLA inthlanna lo awm turah hian ngaihtuahna fím tak nen kal a ngai a, Chakma-te hian independent pawhin MLA nei se, an aiawha sorkar laipuia thusawitu an awm tawh dawn tihna a nih avangin, a bik takin Aizawl leh Lungleiah sorkar laipuia Mizote aiawha thusawitu tur BJP MLA kan neih a ngai hle a ni," a ti.

Dan anga Mizorama Chakma awm nghet tawhte chu ṭhiana siam a ngaih thu leh Bangladesh aṭanga dan loa Mizorama lutte do tura ke pên a ngaih thu a sawi a; Chawngteah police training centre dah an tum thu a sawi bawk.

BJP thuchhuah chuan, an President hian Rotlang West-ah Thorang biala BJP unit ding thar 16 leh BJP zawm thar voter 593 a lawm lut niin an tarlang. BJP Pre­sident hi MDF dintu leh MLA hlui PP Thawlla'n a ṭawiawm a ni.