World Indigenous People Day hmang

Zo Reunification Organisation (ZoRO) chuan, nimin khan LPS Vision auditorium-ah International Day of the World's Indigenous Peoples an hmang a, Central YMA president Lalbiakzuala khuallian a ni.

CYMA President chuan, UN-in International Day of the World's Indi­genous Peoples a puan chhan chu ram leilung fa (indigenous)-te chanvo leh dikna humhalh a ni tih sawiin, "Kan ramah leilung fate chanvo hi mikhual chám rei Chakma-te'n min chuhpui a, vawiinah harsatna kan tâwk a. Mizo lalte'n hnathawk tura an lak luhte'n leilung fate chanvo min chuhpui mek. CYMA chuan eng lai mahin Chakma-te hi indigeneous-ah a pawm ngai dawn lo," a ti.

Lalbiakzuala chuan, Chakma-te chu an duh chuan indigenous an nihna Bangladesh-ah awm se an tih thu sawiin, "Ram leilung fate chanvo an chuh fo hi ṭha kan ti lo a, nasa takin NGO Coordination-in hma a la dawn," a ti a; Joint NGO hmalakna ṭawiawm turin Mizo mipui a sáwm.

Parliament-ah Citizenship Amendment Bill put luh tum mek chu Mizoramah harsatna thlentu a ni dawn tih sawiin, "Kan ṭanho a ngai tak zet a ni," a ti bawk.

Inkhawmah hian resolution an pass a; 'UN Declaration on the Rights of Indigenous Peoples, UN General Assem­bly-in September 13, 2007-a a pass ṭuma a remti záwnga India-in a vote kha lawm­awm kan tiin lawmthu kan hrilh nawn leh a... India sorkarin tun thlenga ram chhunga hman theih tura a la adopt lo hi pawi kan tiin hriatthiam har kan ti hle a. Chuvangin, India sorkar hian UNDRIP hi kan ram, India ram chhungah ngeia hman a nih theih nan Parliament-ah adopt thuai rawh se tiin kan ngen a ni," an ti.