KHAWTHLIR

Nuclear code
Mizoram University vice chancellor Prof. Lianzela chuan, nimin khan MZU Guest House conference hall-ah MZU-a hman turin Energy of Proton Energy of Neutorn (EPEN) nuclear code a tlangzarh. EPEN nuclear code siamtute hi Nuclear and Hydrogen Energy Research Group Department of Physics, MZU an ni. Code hi MZU website www.mzu.edu.in/index.php/physics-epen ah hian en theih a ni a, open source niin, a duh tan hman phal a ni.

Agriculture zirho
National Institute of Agricultural Extension Management, Hyderabad leh State Agricultural Management & Extension Training Institute, Mizoram ṭangkawp chuan nimin khan Agriculture directorate committee room-ah 'State Level Workshop on Revitalizing Agricultural Extension in Mizoram State' an buatsaih.

V/C training
Ni thum awh tur, Champhai district-a V/C member-te tana buatsaih, Mizoram Finance Commission grant account vawn dan zirna chu Thawhlehni khan Champhai Kahrawt community hall-ah ṭan a ni. Training-ah hian V/C-te chu 1st Mizoram Finance Commission grant release order pek nghal an ni.

In kang
Zemabawk Bethel Venga Karan Gurung-te in pahnih Assam type ve ve chu Thawhlehni zan khan bungraw engmah chuh hman lohin a kang ral. Vanduaina thlenna hmun hi Thawhlehni zan hian bialtu MLA Pu R. Lalrinawma leh addl. DC John LT Sanga ten an tlawh a, hnatlang thingpui lumna tur Rs. 2,000 ve ve an pek bakah bialtu MLA hian vanduaina tawkte hnenah Rs. 2,000 leh silpauline a pe a ni. In kang bang hi nimin khan Zemabawk Branch YMA bultuma senghawi a ni.

Tui tihthianghlimna
PHE-in Greater Serchhip Water Supply Scheme-a tui sem tur tihthianghlimna khawl, Electrochlorinator dahna in, Chlorinator House an bun chu nimin khan PHE executive engineer F Lalsanglura'n a hawng.