Freedom from Open Defecation Week Mizoram pumah hman ṭan a ni

Sorkar laipuia Ministry of Drinking Water & Sanitation chuan, August 9-15, 2017 chhung hi Freedom from Open Defecation (khawlaia inthiar awm lohna)-ah a puang a; Week hi nimin khan Aizawl leh district hrang hrangah hawn a ni.

Freedom from Open Defecation hi India ram pum mipuite khawlaia inthiar awm tawh lohna (Open Defecation Free) a nih theihna atan hmalakna chi khat a ni a; Aizawl district chu Open Defecation Free (ODF)-a puan tawh a ni tawh a, nimin khan week pualin Swachh Bharat Mission (Gramin) programme hnuaiah district, RD block leh khaw hrang hrangah a hawnna programme buatsaih a ni.

Week pual hian nimin zing khan Aibawk leh Muallungthu inkarah Chhimphei Group YMA leh Hmuifangtlang Group YMA-te pualin Marathon Race buatsaih a ni a; mi eng emaw zat telin, Aibawkah lawmman semna inkhawm neih a ni.

Week chhung hian Aizawl district-a YMA branch zawng zawngte chu khawlai tihfai hnatlang huaihawt tura beisei an ni a, Aizawl district ramri leh hmun remchang laiah banner tár a nih dawn bakah, lirtheiah pamphlet sem a ni ang a, maxi-cab leh taxi-ahte poster tàr a ni ang.

Serchhip district-a Freedom from Open Defecation Week hman tur chu PHE executive engineer (Serchhip WATSAN Division) F Lalsanglura'n a hawng. Serchhipah hian Week hmanna pui ber chu August 11, Zirtawpni zing dar 8-ah Serchhip Bazar tualah neih a ni ang.

Mamitah chuan Bazar Vengah hawnna inkhawm buatsaih a ni a; khuallian Lalbiaksangi, Mamit DC chuan, chhungkaw tinte faina kawnga hmasawn zel a ṭul thu sawiin, "Kan lo hrisela kan damrei theihna tur chuan faina hi thil pawimawh hmasa ber a ni. Sorkar laipui pawhin faina kawnga hma kan sawn theihna tur leh hma kan lakna turin tih tur hrang hrang min rawn chhawpchhuahsak mek zel a ni," a ti.

Week hawn inkhawm hi PHE sr. executive engineer Lalzawmliana'n kaihruaiin, Sub-Headquarters YMA leh Mamit Town Joint V/C hruaitute'n faina leh thianghlimna kawnga thil pawimawh hrang hrangte an sawi.

Lawngtlaiah chuan ODF Week hi Areopagy-ah hawn a, a hawngtu Dr A Muthamma, DC chuan, an district chu chhung tinin inthiarna ṭha tawk an neih vekna district-a siam turin hmalak mek a nih thu a sawi a, "Kawng tinrenga hmasawn turin hrisel a pawimawh a, hrisel turinnfaina leh thianghlimna kawnga invawn a pawimawh," a ti.

Week hawnnaah hian Miss India Mizoram Rody H Vanlalhriatpuii khualzahawm a ni a; LADC leh state sorkar official te, tlawmngai pawl leh zirlai hruaitute an tel a ni.