Myanmar-a tlawmngai pawlin Tuilian tuarte ṭanpuina an hlan

Zomi Donghu Kipawlna (ZDK), Myanmar chuan, Mizorama tuilian tuarte ṭanpuina atan Thawhlehni khan Champhai YMA Sub-Headquarters hruaitute hnenah ṭanpuina an hlan.

Ṭanpuina hlan inkhawm hi Sub-Hqrs. YMA conference hall-ah buatsaih a ni a; ZDK president Kilpawlna chuan, Mizorama tuilian tuarte ṭanpuina leh chhawmdawlna chu Central YMA-ah direct-a hlan mai âwm tak a nih laiin, kum 2015-a Myanmar rama tuilian tuarte tana CYMA-in vehbur a khawn pawisa fai, buhfai leh thawmhnawte a hmun ngeia hlana zir chiangtu an nih avangin YMA Sub-Hqrs. kaltlanga hlan a nih thu a sawi.

Mizoramah tuilian tuar ṭanpui ngai an awm a ni tih Zomi unaute‘n an hriatin mipui rilru a hneh hle tih sawiin Kilpawlna chuan, "Naupang aṭanga tar thlengin Mizoramin chhiat an tâwk a ni tih kan hriatin kan mittui a tla a ni. Mahni ei ai bakah, mahni bike hial hralh phahte an awm. Ṭanpuina kan rawn ken hi a tam lam ni loin, unau, laichìn kan nih vanga hlan kan ni tih Mizo mipuite'n hria se kan duh," a ti.

ZDK-in Mizorama tuilian tuarte ṭanpuina tur Champhai YMA hnena an hlan hi Rs. 8,50,000 leh buhfai ip 100 a ni a, Champhai YMA hian Central YMA kutah an hlan chhawng leh dawn a ni.