Kuminah chhungkaw 60,000 hnenah Rs 50,000 ṭheuh pek a ni dawn - CM
Chief minister Zoramthanga chuan, Socio Economic Development Programme (SEDP) ṭanpuina sum dawng tura thlan chhungkaw 60,000 hnenah kumin chhung ngeiin Rs 50,000 ṭheuh an pek dawn thu leh ṭanpuina sum chu Mizoram state budget aṭanga sem a nih thu a sawi.
CM Zoramthanga chuan nimin khan Mizo Hnam Rûna inkhawmah thu sawiin, "Kumin chhhung ngeiin SEDP first instalment Rs 25,000 leh second instalment Rs 25,000 ṭheuhin kan sem dawn. SEDP hi khawi aṭanga sum pûk emawa sem kan ni lo a, kan budget aṭang ngeia sem kan ni," a ti.
Zoramthanga chuan, "Pathianin rem a ruat zel a, SEDP pawh tunah kan sem ta mek a ni. Tun financial year chhung hian chhungkaw 60,000 hnenah
Rs 50,000 ṭheuh pek a ni dawn. Financial year tharah Rs 50,000 dawng tawhte pek belh an ni ang a, chumi piah lamah chuan dawng thar tur sing tél kan pek belh leh dawn bawk a ni," a ti a; Covid-19 hripui léng leh harsatna hrang hrang kara eptute'n SEDP sem turin sorkar an phût ṭhin thu a sawi.
Chief Minister chuan, khawvel leh Mizoramin Covid-19 leh chhan hrang hrang vangin sum harsatna an tawk mek nia sawiin, "Sum dinhmun harsat lai takin Delhi-in CSS sum release vek turin state zawng zawng min ti a, vbc. 600 kan release a, SEDP-ah vbc. 150, electric kan leina atan vbc. 37, PMGSY-ah vbc. 70 kan release. Tun hnaiah hlawh leh thil pangngai piah lamah vbc. 800 dáwn kan release a ni," a ti.
Finance minister ni bawk Zoramthanga chuan, hun danga Mizoramin a la hmuh ngai loh sorkar laipui budget-ah Aizawl by-pass road siamna tur cheng vbc. 500 leh bamboo link road atan vbc. 100 dah a ni tih sawiin, "Aizawl by-pass road hi survey neih mek zel a ni a, Sihhmui aṭanga Muallungthu piaha chhuak turin ruahmanna siam mek a ni," a ti a; Bairabi-Mamit NH-a puang tura an ngenna tihhlawhtlin a nih thu a sawi.
MNF president Zoramthanga chuan, MNF chu hun ṭha lo atana ruat an nih thu sawi a awm ṭhin tih sawiin, "Vanduai tura ruat, Pathianin malsawmna a pek loh sorkar ang hiala sawi an awm ṭhin. Covid hripui leh harsatna hrang hrang kan tawh karah Pu Hawla hoa kan nasat loh turzia hriaiin Pathianin a hun takah, hun harsa atan MNF min hûng chhuak a ni," a ti.
Eptute chu sorkar sawiselna tur leh hêkna tur ringawt zawngah puhin Zorama chuan, "Mi ṭhatna lai sawi an thiam ngang lo a, mi chhiatna lai zawng char char a, sawiselna tur ringawt zawngte hian ngeitu an ngah tulh tulh. An thu thiam hi ruling beih nan chiah a ṭha a ni," a ti a; MNF chu Pathianin a la enkawl reng a, arsi a la êng zual zel dawn niin a sawi.
Zoramthanga chuan, Congress chu Delhi lamah inthlang hlei thei lo khawpin an buai nia sawiin, "Báng si, thu ber tum bawk si Rahul Gandhi an nei a, an buai hle. Mizoramah pawh MLA pahnih/khat bak an neih a rinawm loh," a ti. ZPM chungchangah, "Candidate tur an insáwm tam lutuk, an la buai nasa dawn chauh. Nomination committee ṭhu se an buai nasa khawp ang," a ti bawk.