Mizorama rél kawng siam mekah MP Rosanga'n NFR hotute a ngen

Lok Sabha MP C Lalrosanga chu nimina Guwahati-a hmarchhak bial MP-te leh Northeast Frontier Railways (NFR) hotute ṭhutkhawmah a tel a; Mizorama rél kawng siam mekah NFR hotute puihna a ngen.

C Lalrosanga chuan, Bairabi leh Sairang inkara rél kawng siam mek bakah, Sairang aṭanga Mizoram chhim lam thlenga rél kawng siam turin NFR hotute a ngen a, "December 2023-a zawh hman tum km. 51 vela thui Bairabi-Sairang rél kawng piah lamah, Lawngtlai district-a Hmawngbuchhuah thlenga rél kawng siam tumna hi tihlawhtling ngei turin ka ngen a ni," a ti.

Hmawngbuchhuah thlenga rél kawng siam tur atana km. 223-a thui enfiah tawh chungchang sawiin Lalrosanga chuan, "Rél kawng thar siam rawtna hi kaltlangpui theih loh tura ngaih lo ni tawh mah se, Act East Policy nena inzúlin Kaladan Multi Modal Transit Transport Project nena inzawm thei turin a ṭangkai hle dawn a ni," a ti bawk.

NFR general manager Anshul Gupta chuan, Hmawngbuchhuah thlenga rél kawng siam tum chu tih tlang tum a nih thu sawiin, "Tunah hian Sairangah rél chawlhhmun changkâng tak, chhâwng thum, square metre 6,372-a zau din mek a ni a, metre 6-a zau subway a awm ang," a ti a; Bairabi-Sairang rél kawng siam mek atan cheng vbc. 6,527 ruahman a nih thu a sawi.