Tuidam zaua oil palm huan neitute Mimalin an kawng a siamṭhatsak

Tuidam zaua oil palm chíngtute'n an huan panna kawng a ṭhat loh avanga thla hnih chhung vel oil palm-te an hralh theih loh hnuah, tun hnai khan mimalin kawng a siamsak a, oil palm-te an hralh chhuah leh thei tawh.

Tuidam zauah hian chhungkaw 30 velin oil palm huan an siam a, chhungkaw tam zawk chuan eizawnna atan bera an hman a ni. Kumin fûrah huan panna kawng chu ruahin a tichhia a, hnatlangin an thawm ṭha ṭhin. Kawng chu kawng laihna vûngin a tihchhiat belh bawk. Chu'ngte avang chuan July 2022 aṭang khan oil palm hralh turin an phur chhuak theih tawh lo a ni.

Poil palm chíngtute harsatna chu anmahni enkawltu department hotute hnenah sawi ṭhin mah se, hma an lak theih loh avangin thla hnih vel chu oil palm an hralh thei lo.

Tuidam zaua oil palm chíngtute harsatna tawh hi hriain oil palm chíngtu tho, Darlak zaua huan neitu Vanlalruata Pachuau chuan tun hnai khan a excavator hmangin kawng chu tractor kal theih turin a siamsak a ni.