Grape chíngtute'n lawmthu an sawi

Champhai Grape Growers Society chuan thuchhuah siamin, August 30, 2022-a Cabinet ṭhu­khawmin Champhai leh a chhehvela grape chínga eizawngte tana thutlukna lawmawm, dan anga grape wine siam leh zawrh phalna a pawm avangin an lawm a, an thla a muan thu an tarlang.

Mizoram sorkar chungah an lawm tak meuh tih sawiin Champhai Grape Growers Society chuan, "He dan hian grape chíngtute hmakhua nasa taka ti êngin, hmasawnna rahbi pawimawh tak a siamsak ngei dawn a ni," an ti.

Champhai Grape Growers Society chuan, an harsatna hriaa political party hrang hrang - Congress, ZPM, BJP leh PC party-te'n an theih ang tawka hma an lakpuina leh No Objection Certificate an siamsak avangin thinlung taka an lawm thu an tarlang a; anmahni thláwptu pawl hrang hrang, media-a an thlavâng hauhtute leh mipui thlàwpna an dawn avangin an lawm thu an tarlang bawk.