ZPM hi sorkar siam tura mipuiin An beisei ber a ni - Lalduhoma

ZPM leader Lalduh­oma chuan Pathian chakna nena Mizoram siamṭha tura thawhpuiah mipui sáwmin, sorkar siam tura mipuiin an beisei ber chu ZPM an nih thu a sawi.

Lalduhoma hian Dam­pa biala Rajiv Nagar, Tuipuibari, Dam­parengpui, Hruaitluang leh Khawhnai khua a tlawhnaah thu a sawi a; India ram pumah Cong­ress party an tlachhia a, MNF chu vai smuggler ho phênah an hotu pa ber a awm niin mipuiin an ngai nia sawiin, "Candidate ṭha tak tak rawn nei leh mah se, a lu berin a zir loh avangin an tla dawn a, an hun a her liam mek. Sorkar siam tura mipuite'n an beisei ber chu ZPM kan ni," a ti.

ZPM Leader chuan, an party-in hmun hrang hrangah hma an sâwn zel nia sawiin, "Mi leh sa kan neih ngai rêng rêng lohnaahte unit dinin, mi leh sa eng emaw zat kan nei ta zel a, kan theihna leh chakna vang ni loin, Pathian hnathawh a ni. Kan hma hruaitu hi a awm a, rinhlelh rual a ni lo," a ti a; ram hmangaihtute ZPM-ah tel a, ram siamṭha tura thawhpuiah a sáwm a ni.

Lalduhoma chuan, ZPM-in sorkarna an siam chuan Mizorama thlai tharte man mumal tak siam a nih dawn thu sawiin, "Ram páwna thawn chhuah leh ram chhunga hralh dan turte a tahtawlin sorkarin a ruahman ang a, a ṭul ang zelin minimum support price a pe dawn. Tih tak taka titute chu an bánah kaiin hma kan lâkpui dawn," a ti.

Mizoram sum leh pai dinhmun thlirin, sum enkawlah MNF hruai sorkar a hlawhchham tih a chiang tih sawiin ZPM Leader chuan, "State khat sorkar ve riang ruangin cheng nuai 20 chauh neih chángte an nei hial. Sorkar hnathawkte hlawh a hunah a pe thei lo a, tunah hian kan sum dinhmun a buai em em a ni," a ti a; sum harsat chhan ngaihtuah chian a ṭul thu a sawi.

ZPM thuchhuah chuan, khua a tlawh hrang hrangah hian ZPM zawm thar mi 86-te Lal­duhoma'n a lawm lut niin a tarlang.