KHAWTHLIR

Thisen pe
Institute of Advanced Studies in Education (IASE) NSS chuan nimin khan an college auditorium-ah thisen pek an huaihawt a, Civil Hospital, Aizawl tan thisen unit 72 an pe.

Ni zung chakna
Ni zung chakna (solar energy) hmanga Mizorama damdawi-inte châwm dan tur chungchangah nimin khan Health minister Dr R Lalthangliana hoin a pisaah SELCO Foundation chief executive officer Harish Handa, NABARD Mizoram general manager Prasada Rao leh HFW department hotute an inkâwm. SELCO Foundation sum hmangin health centre 40-ah pilot phase bul ṭan tum mek a nih thu tarlan a ni.

Day pathum hmang
National Health Mission, Mamit chuan nimin khan Mamit Chhimveng YMA Hall-ah Adolescent Health & Wellness Day, National Deworming Day leh National Nutrition Week an hmang a, thupui chu 'Eat right, future bright' tih a ni. Nutrition Week pualin khawpui chhungah kawng zawh a ni a, kal khâwmte chu rúlhût hlo pek vek an nih bakah, Mobile Medical Unit-in a thlawna inentirna an buatsaih a ni.

MLA-in enfiah
Lawngtlai East bialtu MLA H Biakzaua chuan nimin khan Lawngtlai College Venga Residential Sports School sak mek a tlawh. Sikul sak mek hi Pradhan Mantri Jan Vikas Karyakram aṭanga hmuh cheng nuai 3,461.70 hmanga sak a ni a; MLA chuan, theihtawp chhuah zel tur leh harsatna an neihte a hnena thlen ṭhin turin hna thawktute a chah.

Zun-in hawng
MHIP, Ramhlun North Branch-in ODF+ Compliance Swachh Bharat Mission (Urban) hnuaia an venga vantlang zun-in an siam thar chu nimin khan bialtu councillor C Lalchhandami'n a hawng. Ward-III Councillor chuan, zun-in chu thianghlim taka kalsan zel turin a hmangtute a chah a, ODF+ tling zun-in siamte chu hnam dangin awlsam zawka an hmuh theih nan Google-ah dah luh vek tum a nih thu a sawi.