School fee a pangngaia khawn a ni MZP leh MSU-in hriatthiam har an ti

Vanglaini palai zawhna chhangin MISA president C Lalthanzauva chuan, an pawl chuan school fee a pangngaia khawn turin thutlukna an siam tih a sawi a, "Chutih rual erawh chuan, mihring dinhmun a inang lo a, intihluihna awm loin, hriatthiam ngai an awm chuan an dinhmun thlir chungin fee an pek zat tur bituk theih ni se tih chu kan duh dan a ni," a ti.

C Lalthanzauva chuan, school fee a pangngaia khawn an rèl chhan sawiin, "Zirtirtute rilṭáma awmtir ngawt kan thei bik lo a, an hlawh pek ngei kan duh. School ṭhenkhat chu mi building luah an ni a, in luah man an chawi tho a ngai," a ti a; dan pangngaiin sikul kal thei lo mah se, an senso a ngai reng niin a sawi.

Hetih lai hian, School Education minister Lal­chhan­dama Ralte chuan, MISA hruaitute chu School Education direc­to­rate lamin an kawm tawh thu Vanglaini palai zawhna chhangin a sawi a, "Education direc­to­rate-te ka be tawh a. Vawiin (Thawhṭanni)-ah Education secretariat-te ka kâwm dawn a, naktuk (Thawhlehni)-ah MISA hruai­tute kawm ka tum," a ti.

School fee chungchang­ah sorkarin thutlukna a la siam lo tih sawiin Educa­tion Minister chuan, "Official leh MISA-te nen kan ngaihtuahho ang a, chumi hnuah thutlukna siam a ni ang," a ti a; sawiho a nih hma chuan ngaihdan a sawi theih loh thu a sawi.

Vanglaini palai zawhna chhangin MZP president B Vanlaltána chuan, zirlaite sikul an kal loh avangin school fee khawn loh chu an duh dan a nih thu a sawi a, "Chutih rualin, sikul neitute dinhmun thlirpui ve a ngai a, zirtirtu hlawh leh in luah mante an pek theihna atan 50% hi chu khawn se, a âwm kan ti tho," a ti.

MZP chuan thuchhuah siamin, nimin khan private school neitute fee lak dan an sawipui thu an tarlang a, "Private school hrang hrangin fee an lak danah sorkar thu neituteah ngenna leh rawt­na kan lo thlen tawh bawhzuina leh hmalakna mumal a awm lo hi pawi kan ti hle," tiin an sawi.

Sikul ṭhenkhatah online hmanga class kal ang leh home work inpek vanga fee lak tumna awm chu an hrethiam lo tih sawiin MZP chuan, zirlai nu leh pa dinhmun inang lo tak takte hrethiam chung leh sikul inrêlbâwlna âwm tawk hre chunga 50% aia sang lo fee la turin private school neitute an ngen a ni.

MSU hruaitute nimina ṭhukhawm chuan, Covid-19 vanga inkhàrkhip a nih laia MISA-te'n school fee a pangngai anga lak an tum chuan zirlaite a barakhaih thu tarlangin, "Inkhârkhip chhungin zirna-in khâr vek a ni a, chuti chunga zirlaite aṭanga fee lak tum a ni hi kan hrethiam lo tak zet zet," an ti a, school fee chungchang chu Education Minister hnenah an thlen nghal thu an tarlang.

MSU chuan, school fee chung­changah kum 2013 khan Mizoram sorkar nen inremna a neih tawh thu tarlangin, "Mizoramin hun harsa a tawh lai hian sorkar chu zirlaite ngaihtuah reng chunga hma la vat turin kan phût. Khaw hrang hranga private school neitute leh thawktute pawh inkhârkhip chhung chu zirlaite aṭanga fee la lo turin kan ngen a ni," an ti.

Hetih lai hian, mimal sikul ṭhenkhat chuan social media kaltlangin thu­chhuah an siam a, zirlaite sikul an kal theih loh lai chuan school fee lâk an tum loh thu an tarlang a ni.

•    MISA-in zirtirtute hlawh leh in luah man thlir chungin fee khawn an rél

•    School Education department-in fee chungchangah thutlukna a la siam lo

•    MZP-in sikul neitute dinhmun thlirin fee 50% khawn a âwm an ti

•    MSU-in fee khawn lo turin private school neitute an ngen