National Deworming Day hman a ni

Nimin khan Mizoram hmun hrang hrangah National Deworming Day (NDD) 2022 hman a ni a, Health minister Dr R Lalthangliana'n Synod Higher Secondary School auditorium-ah a hawng. NDD hi district hrang hrangah hman a ni a, kum 1-19 inkar hnenah rúlhût hlo (Albendazole) pek beihpui thlak a ni.

Health Minister chuan, naupangte ṭhan lennaah hriselna ṭha an neih theih nan sorkarin kawng hrang hrangin hma a la tih sawiin, "Hmalakna pawimawh tak pakhat chu rúlhût laka naupang fihlimna a ni a, National Deworming Day kan hmang ṭhin. Mihring nuna hun pawimawh ber chu kum 1-19 inkar, zirna leh seilenna hun a nih avangin kan puitlin huna kan nih dan tur hriltu a ni a, taksa enkawl uluk a, hrisel kan mamawh zual lai a ni," a ti.

Health department bakah, School Education department, Women & Child Development, Rural Development department leh Public Health Engineering department thawktute thawhhona leh thawhrimna avangin NDD an hmang thei tih sawiin R Lalthangliana chuan, NDD hlawhtling taka kalpui a nih theih nan duhsakna a hlân a ni.

NDD hi kum 2015 khan India ramah state leh union territory 11-ah hman ṭan a ni a, February 2016 aṭangin state/UT zawng zawngah hman a ni.

NDD hmalakna hi rúlhût pâi vanga natna hrang hrang awm thei - thisen tlâkchhamna leh naupang ṭhanṭhû ûm bona tura ruahman a ni a; ram pum huapin kum 1-19 inkarte tan kum tin vawi hnih a ruala rúlhût hlo eitirna hun hman a ni ṭhin.

Mizorama NDD hman hnuhnun ber, April 2022 khan naupang sikul kal leh kal lo 96%-in rúlhût hlo an ei a; nimina rúlhût ei ve thei lo leh ei hman lote pualin September 9, 2022 khian Mop Up Day hman leh a ni ang.