BJP hi secularism vawng himtu kan ni - Mizoram BJP President

BJP, Mizoram Pradesh president Vanlalhmuaka chuan nimin khan an party pisaa inkhawmah thu sawiin, "BJP hi secularism (sakhaw zalenna leh tih bik neih lohna) vawng hima hma latu kan ni," a ti.

Vanlalhmuaka chuan, India ram chu secular ram a nih thu sawiin, "Sakhua lam huam lo leh thliar bik nei lo a ni a, nimahsela, sakhaw tam tak erawh chuan chu chu hrethiam loin, secular ni lo ang maiin kan inzirtir ṭhin a, a pawi hle," a ti a; BJP chu secularism vawng himtu niin a sawi a ni.

MNF sorkarin flagship programme atana SEDP an hmanah secularism bawhchhiatna lian tak tak a awm nia sawiin Vanlalhmuaka chuan, "Party tih bik tlatna, party dang en kânna leh thliarna nasa takin an kalpui a. Political party reng rengin affiliation an tih dawnin thlei bik leh thliar bik a rem loh thu an intiam thlap a ni," a ti.

Mizoram BJP President chuan, India ram chu democracy leh secularism ram a nih thu sawiin, "Chi leh chi emaw, sakhua chungchangah emaw thliar bik tu mah an neih a thiang lo," a ti a; central-a BJP kaihhruai sorkarin PM scheme hrang hrang a kalpuiah thliar leh thlei bik an awm lo a, mamawhtu dik takin an dawn theih nan hma an la tih a sawi.

Vanlalhmuaka chuan, kum 2023-a Mizoram inthlanpuiah BJP-in sorkarna an chan theihna turin nasa takin hma an la mek tih sawiin, "Kan hmalakna aṭangin party dang VC tam tak chuan BJP VC thar an siam nual tawh a ni," a ti a; kum 2023 inthlana an auhla tur pakhat chu 'Give change a chance' tih a nih thu a sawi bawk.