AMC-in leiṭha an siamte an hralh mek

Aizawl Municipal Corporation (AMC)-in Aizawl khawpui bawlhhlawh ṭawih thei hmanga leiṭha an siam chu chawlhkar khat chhungin ip 400 vel an hralh tawh a; bawlhhlawh hman nawn theih (recyclable waste) quintal 5,670 hralhna aṭangin chhiah Rs 1,82,274 an hmu tawh.

AMC Solid Waste Management changtu executive councillor Laltlanzova Khiangte chuan Vanglaini palai zawhna chhangin, AMC-in Aizawl khawpui bawlhhlawh ṭawih thei paih aṭanga leiṭha an siam chu August 26, 2022-ah Aizawl Mayor-in hralh theih turin a hawng a, chawlhkar khat chhungin ip 400 vel an hralh tawh thu a sawi.

Laltlanzova Khiangte chuan, recyclable waste hralhna aṭang hian AMC-in chhiah Rs 1,82,274 a hmu tawh tih a sawi a, "AMC hmalakna pakhat, bawlhhlawh hman nawn theih (recyclable waste)-te chu dealer-te kaltlangin tihral ṭhin a ni a, March 7, 2022-ah hralh ṭan niin, September 2, 2022 thlengin quintal 5,670 hralh tawh a ni," a ti.

Bawlhhlawh sawngbawlna, Solid Waste Management Centre chu AMC-in kuminah a enkawl ṭan chauh avangin an project-te hlawhtling hman a la awm mang lo tih sawiin Laltlanzova chuan, "Waste management centre thar neih tumna leh bawlhhlawh hâl ralna (incinerator) bun tumnate pawh kalpui mek a ni," a ti a; khawpui dang tam takin an tih theih loh AMC-in leiṭha an siam ṭan te, recyclable waste aṭanga sum an la lut tate chu mi tam takin an lawmpui nia a hriat thu a sawi.

Laltlanzova Khiangte chuan, AMC-in bawlhhlawh sawngbawlnaah hna an thawh ṭan dawn chauh avangin bawlhhlawh chinfelna turah sum leh pai bakah, hun leh thâ an la mamawh tam dawn thu a sawi bawk.