CM-in ama dinhmun chiah a ngaihtuah - MPCC Spokesperson

Mizoram Pradesh Congress Committee (MPCC) chuan nimin khan Congress Bhavan-ah political session an nei a, thusawitu MPCC spokesperson PC Laltlansanga chuan chief minister Zoramthanga'n ama dinhmun chiah a ngaihtuah thu a sawi.

PC Laltlansanga chuan, MNF sorkarah Chief Minister berin ram dinhmun a ngaihtuah lo nia sawiin, "Ama dinhmun chauh a ngaihtuah. Chu-tiang tura mi ṭha ni lo amah support theitu lamṭang siamin, cheng khat hlawh tura nihna sang tak ruattu a ni. Sum a harsa em em a, health care bill tang leh contractor ten bill an la thei lo," a ti a, sorkar hnathawkte'n GPF phei chu an beisei ngam tawh lo niin a sawi.

Zoramthanga'n SEDP-ah cheng nuai 3 sem a tiam nia sawiin MPCC Spokesperson chuan, "NLUP dawngtute pawhin an dawn vek tur thu a sawi a ni. Cheng nuai thum aṭangin sing ngaah a tla thla a, tunah a joker a phawrh a, Rs 25,000 ah an tla thla leh a ni," a ti.

PC Laltlansanga chuan ZPM chungchang sawiin, "Unit system nuaibote an sawi a, Chakma tel lo sorkar siam tumin Chakma-ah unit leh block an din a ni. An Val Upa Council te thupek pawisa loin hlawh leh hamṭhatna dang zawng zawng an la vek," a ti a, ZPM chuan a tak finfiah tur awm si lo, mipui rilru hruaikawi tura thusawi an chin thu a sawi.

MPCC Spokesperson chuan Mizoram mamawh chu kalphung thar ni loin nihphung thar a nih thu sawiin, "Thusawi lama distinction pass ni lo, second a pass Mizo mipuiin an duh. ‘Ṭhat Loh Theih Lohna Bawmah’ chuan ei ruk duh, sum leh pai duhte pawh kan president-in ram a hruai duh dan takin min hruai dawn a, tute pawh an lo ṭha tawh ang," a ti.