Grape wine mante pek kîr vek ZPM party ṭhalaite'n an phût

ZPM Ṭhalai chuan, Cabinet thutluknain grape wine siam leh zawrh a phal tak avangin May 27, 2022-a Aizawla grape wine man zawng zawng chu a neitute hnena pe kîr vek turin Mizoram sorkar an phût.

ZPM ṭhalaite chuan thuchhuah siamin, "Chief Minister leh Excise Minister hmalakna avanga 27.5.2022-a grape wine tam tak man a nih avanga kut hnathawktute leh sumdawngte rilru hah taka an awm hnuah leh, grape wine mansak vang nia rin theih tura thihna hial a thlen hnua August 30, 2022-a Council of Ministers ṭhukhawmin grape wine siam leh zawrh an phal leh hnuah hian, Aizawla grape wine mante a neitute hnenah a bo a bâng awm loa pe kîr vek turin kan phût," an ti.

Grape wine chungchangah MNF kaihhruai sorkar chu luang thli chhêm nghîn ang maia nghet lo nia an ngaih thu sawiin ZPM Ṭhalai chuan, "Kut hnathawktute hlâwkna tur leh an hamṭhatna tur ngaihtuah turin kan ngen a ni," an ti a; CM Zoramthanga leh Excise minister Dr K Beichhua te chu grape wine chungchangah dinna nghet nei a, kut hnathawktute leh sumdawngte tithlabár zawnga che tawh lo turin an ngen a ni.