Hripui vei enkawl lai mi 464 an awm

September 1, Ningani khan Mizoramah Covid-19 vei mi 82 hmuh chhuah a ni a, nimin khan hripui vei dam tawh mi 94 chhuahtir an ni. Niminah Covid-19 vanga thi an awm lo a, nimin tlai khan hripui vei enkawl lai mi 464 an awm.

Ningania Covid-19 positive hmuh thar mi 82-te chu mipa 34 leh hmeichhia 48 an ni a, rapid antigen test hmanga hmuh chhuah vek an ni. Swab sample endik zat 554 aṭanga positivity rate chu 14.80% a ni.

Nimin khan hripui vei dam tawh mi 94 chhuahtir an ni a; district tina chhuak zat chu - Aizawlah mi 28, Lungleiah 24, Mamitah 18, Lawngtlaiah pasarih, Saitualah paruk, Siahaah panga, Khawzawlah pathum, Hnahthialah pahnih leh Champhaiah pakhat a ni.

IDSP record angin, Mizoramah Covid-19 vei 2,37,260 hmuh chhuah a ni tawh a, mipa 1,10,497 leh hmeichhia 1,26,763 an ni a, mipa aiin hmeichhia 16,266-in an tam zawk. Nimin tlai dar 5 thleng khan mi 2,36,074 (99.50%) chhuahtir an ni tawh a, mi 722 (0.30%) thi tawhin, enkawl mek mi 464 (0.20%) an awm.

Kum 2011 chhiarpui angin, Covid-19 vei hmuh tawh 2,37,260 chu state mipui zat aṭangin 21.62% a tling a, India rama state zingah a sang ber. Mi 1,000 zelah positive 216 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.