Kut tling loa sum lak luh chíngte kan huat a hun tawh - CM Hawla

Tribal Girls' Hostel, Thenzawla NIELIT Study Centre din thar chu nimin khan chief minister Lal Thanhawla'n a hawng. CM chuan, kuttling loa sum lak luh chíngte huat a hun tawh thu a sawi.

Lal Thanhawla chuan, kut tling loa sum lak luh duhnain harsatna a thlen ṭhin thu sawiin, "Zoram mipuite'n kuttling loa sum lak luh chingte an huat a hun tawh. Tunlaiah company leh sorkarin ram ruakah man nei loin hmasawnna ruhrelte din an duh vek tawh. Compensation beiseina a la awm reng chuan hmasawnna ruhrel tam tak Mizoramin a chán ang tih a hlauhawm a ni," a ti.

Chief Minister chuan, Mizoram mipuite'n computer thiamna kawngah hma an sawnna turin NIELIT chuan DOEACC tih a nih lai aṭangin theihtawp an lo chhuah ṭhin thu sawiin, "Hmasawnna ruhrel tamtak siam ṭhin mah ila a hlawh­tlinna atan a chhawrtu mipui rilru a pawimawh ber," a ti a; hmathlir thui tak nena hmalam hun thlira rilru buatsaih a pawimawh thu a sawi.

Eng kawngah pawh thiamna satliah mai a tâwk lo tih sawiin CM Hawla chuan, "Thiam làwr duah aiin, thiam bel, uluk peih leh hmáwrbàwkna pawimawhna hrethiam khawpa thiamna a pawimawh. Duhsak tlak, hlawhtling tlaka mipui kan inher rem a ngai tawh," a ti.

NIELIT Study Centre-ah hian vawiin aṭangin zirlaite an kal ṭan dawn a, batch hmasa berah zirlai admission diltu zing aṭangin mi 100 thlan chhuah an ni. NIELIT Centre-ah hian Course on Computer Concept (CCC) zirtir an ni ang.

Nimin vek khan Lal Thanhawla hoin Thenzawl Joint YMA Hall-ah Commerce & Industries Department hnuaia beneficiary te hnenah NLUP ṭanpuina sem a ni.

Hawla chuan, NLUP chu ṭanpuina rintlak, mirethei te, inhlawhfa te, eizawnna mumal neilo te, rahbi tleu tawh leh mi khawsak harsa hrang hrang te zawngtu a ni tih a sawi a; NLUP hmalakna dik taka kalpuitu, hlawhtling tura puih la ngai e chu NEDP tanpuina hmanga chawmdawl an ni ang a ti.

Thenzawla NLUP ṭanpuina semnaah hi J.Hmingthanmawia, director, Commerce & Industries in a kaihruai a, Principal Adviser to CM RL Rinawma leh Serchhip bawrhsap Sangchhin Chinzah ten thu an sawina bawk.

Thenzawla NLUP ṭanpuina dawngtute hi an vaiin mi 307 niin handloom trade an thlang deuh vek a, ṭanpuina sum Rs.79,31,070/- pekchhuah a ni.