Central pool atan MBBS leh BDS-ah Mizoramin seat allotment a la hmu lo

Mizoram sorkar chuan Bachelor of Medicine, Bachelor of Surgery (MBBS) leh Bachelor of Dental Surgery (BDS) zir turte tan central pool hnuaia seat allotment a la hmu lo.

Higher & Technical Education (HTE) department hotute hnen aṭanga Vanglaini thu dawn danin, MBBS leh BDS atan hian central pool hnuaiah allotment hmuh la ni lo mah se, kum dang ngaihtuahin a la tlai lo. Zirlaite tan admission tih kawngah pawh harsatna a awm loh an beisei.

HTE department chuan, central pool-a MBBS leh BDS seat chu nikuma an hmuh zat ang an ruahman chhin phawt a, allotment hmuh a nih veleh counselling neih ṭhat leh tur a ni. Nikum khan Mizoram chuan central pool hnuaiah hian MBBS-ah seat 25 leh BDS-ah seat pathum a nei.

NEC hnuaiah chuan Mizoram sorkar hian seat allotment a nei tawh a, RIMS, Imphal-ah zirlai pasarih, NEIHGRIMS, Shillong-ah zirlai pathum, leh Dibrugarh-ah zirlai pakhat tirh an ni.

HTE dept. chuan zirlai 23 te chu counselling neih pui tawh mah se, central pool atan hi chuan allotment hmuh hunah counselling neih ṭhat leh vek tur a ni.