Inkhârkhip thawh thumna Sorkarin inkhârkhipin a huam loh a belh
India ram pumah inkhàrkhip (lockdown) thawh thumna chu nimin khan kalpui ṭan leh a ni. Mizoramah pawh inkharkhip hi thlahdul hret a nih avangin nimin khan Aizawlah páwna chhuak an tam hle. Hetih lai hian, inkhârkhip thawh thumnaa inkaihhruaina tihchhuah tawh ṭhenkhat chu tihdanglam a ni.
Inkhàrkhip thawh thumna, May 4-17 chhung kalpui tur chu nimina kalpui ṭan a nih aṭangin Aizawlah chuan khawlaia chhuak an tam tawh hle a, traffic pawh hmun tam takah a jam nghal a ni. Dawr inhawng a tam tawh a, sumdawnna lirtheite an tlan chhuak ṭan bawk.
Inkhârkhip thawh thumnaa inkaihhruaina tihchhuah tawh ṭhenkhat chu tihdanglam a ni tih State Disaster Management Authority hnuaia State Executive Committee Chairman chuan a puang a; commercial passenger vehicle tlân thei zingah two wheeler taxi belh a ni.
Intlân chhâwkin a huam loh zingah print & electronic media mite lirthei, bawlhhlawh paih, bawnghnute phurh/semna lirthei belh a ni bawk.
Mihring phur chi sumdawnna lirthei, khaw chhunga tlan theite chu - bus, taxi, auto-rickshaw leh two wheeler taxi-te a ni a, registration number odd-even angin an intlân chhâwk ang. Odd number (kawpkim lo) lirtheite chu Thawhṭanni, Nilaini leh Zirtawpniah an tlan ang a, even number (kawpkim) lirtheite chu Thawhlehni, Ningani leh Inrinniah an tlan ang.
Mihring phur lirtheite chu Pathianniah tlân phal a ni lo a, passenger ṭhut theih zat (seating capacity) zatve (50%) aia tam (two wheeler taxi tiam loin) phurh phal a ni lo. Hmai tuamna vuah vek tur a ni a, lirthei enkawltute’n passenger-te hman tur hand sanitiser an pâi reng tur a ni.
Intlân chhâwk hian duty-na atana hman sorkar hnathawkte lirthei, task force duty-te lirthei, ambulance leh medical emergency-a hman lirthei, print & electronic media mite lirthei, bawlhhlawh paih lirthei, bawnghnute phurh/semna atana hman lirtheite a huam lo.
State páwn aṭanga Mizorama lut mikhualte thlen (mikhual) phal a ni lo a; hei hian Home department emaw DC emawte’n phalna an pekte a huam lo thung.