Aizawl Hospital leh Care Hospital-te sorkara empanel nihna tihtawp a ni
Aizawl Hospital and Research Centre (AHRC), Khatla leh Care Hospital, Dawrpui te chu Rashtriya Swasthya Bimal Yojana (RSBY) an zawm duh lo a, RSBY-a inziak lut damlote an dawnsawn duh loh avangin an damdawi-ina damlo awm reng reng Mizoram sorkar aṭanga medical reimbursement (MR) tih theih ṭhin tihtawp a ni.
Health secretary Lal-rinliana Fanai-in Notification a chhuaha a lan danin, Aizawl Hospital leh Care Hospital-te hi RSBY-a inziak lutte (BPL chhungkuate an ni) chu MR bill theih a hniam avangin an dawngsawng duh lo. Mizoram sorkar leh Mizoram State Health Case Society (MSHCS) chuan heng mite hi dawngsawnga admit ṭhin turin a lo ngen tawh a; ngenna chu an chháng lo.
Chief Minister hoa July 11, 2017-a MSHCS Governing Body meeting vawi 15-naah AHCH leh Care Hospital thil tih dan chu ngaihtuah a ni a; damdawi-in pahnihte Mizoram sorkara empanel an nihna (empanelment) chu tihtawp an rél thlu a ni. Mizoram sorkara empanelled/recognised hospital ni tur hian RSBY leh Mizoram Health Care Scheme an pawma an kalpui a ngai nia thu dawn a ni.
AHRC leh Care Hospital-te Mizoram sorkara empanelment/recognition tihtawp a nih tâk avang hian Mizoram sorkar hnathawkte leh Mizoram sorkar aṭanga MR bill thei tur reng rengin AHRC leh Care Hospital-a an awm/inenkawl man sorkarah an la (bill) thei tawh dawn lo.
Health Secretary-in notification a chhuah hun hi nimin August 10 kha a ni a; notification hi nimin aṭang khan hman nghal a ni. Chutih rualin, notification chhuah a nih hmaa zawnga AHRC leh Care Hospital-a damlo awm mekte erawh a huam lo thung.