Rúlhût do beihpui thlâk a ni

Nimin khan Aizawl leh district khawpui hrang hrangah naupangte rúlhût laka an fihlim theihna atana beihpui thlakna, National Deworming Day (NDD) hman a ni a, Aizawlah chuan Mizo Higher Secondary School-ah Health minister Lal Thanzara hoin hun hman a ni.

Health Minister chuan, India ramah kum 2015 aṭangin National Deworming Day hman a ni a, naupang leh zirlaite rúlhût laka an fihlim theih nan kalpui a nih thu a sawi a, "A hlâwknate hmuh a nih hnuin February 2016 aṭang khan hman chhunzawm a ni. NDD hian a tum ber chu rúlhût pai vanga natna hrang hrang thleng thei bakah, thisen tlâk­chhamna leh naupang ṭhanṭhu ûm bo a ni," a ti.

Kum 1-19 inkarte tan kum tin vawi hnih India ram pum huapin a ruala rúlhût hlo eitirna hun hman ṭhin a nih thu sawiin Lal Thanzara chuan, "Mizoramah pawh February 2016 khan hman ṭan niin, round hnuhnung ber February 2017-ah naupang sikul kal leh kal lo 96%-in damdawi an ei a ni," a ti a; rúlhût pai lo tura tih theih awlsam tak takte chu -kut silfai ṭhat, ei tur silfai ṭhat, tui thianghlim in leh in leh a vel vawn faite a nih thu a sawi.

National Deworming Day hi Mizoram district zawng zawngah a ruala hman a ni a; naupang sikul kal leh kal lo, sorkar sikul leh private sikulte pawh a huam a ni.

Rúlhût damdawi Albendazole chu sikul­ah leh anganwadi centre-ahte a thlawnin ni ruat bikah hian ei theih a ni a, August 17-ah Mop Up Day neih leh tur niin, chutah chuan damdawi sem leh a ni ang.

National Centre for Disease Control (NCDC)-in a zir chiannaah chuan, Mizorama rúlhût pai thei dinhmuna ding naupang (Soil Transmitted Helminth Prevalence) awm zat chu 51% a ni.