NLUP hnuaia sangha supply danah ACB-in thil dik lo an hmu chhuak lo

Anti Corruption Bureau (ACB) chuan, NLUP hnuaia sangha chi supply danah NLUP Implementing Board (NIB) vice chairman PL Thanga leh NIB secretary James Lalrinchhana te thil tih dik loh an hmu chhuak lo a, an thubuai tihtawp a ni.

NLUP hnuaia sangha chi supply chungchangah hian Chief minister Lal Thanhawla chuan kum 2015 khan ACB chhui chiantir turin Vigilance department a hriattir a; ACB chuan PS Case No.5/2016 Dt.10.8.2016 U/S 13(1) (d) R/W 13(2) PC Act, 1988 hmangin thubuai an ziak lut.

ACB chuan thubuai hi an chhui chian hnuah thil dik lo awm ngeiin an hria a, an thil hmuh chhuahte chu Vigilance department-ah an thehlut a ni. Vigilance department thurawn angin, thubuaiah hian criminal case an ziak lut a, NIB Vice Chairman leh Secretary-te chu an thuneihna hmang sual leh an hnathawh danah thil ti fel tawk loah puh an ni.

PL Thanga leh James Lalrinchhana te hi August 10, 2016 khan thubuai siamsak an ni. ACB chuan an chhui zui a, an chhuina report chu Court-ah thehlutin, thubuai siam zui zelna tlak an hmuh chhuah loh thu an tarlang. Hei vang hian thubuai tihtawp a ni.

July 6, 2015 khan Setlakzau Farmers Association secretary John Vanlalchhuanga chuan Chief Minister hnenah, 'NLUP pawisa hmanga Fisheries department sangha chi sem tura supplier-te chhui chianna' tih thupuia hmangin lehkha a thawn a. Lehkha chu Chief Minister chuan bawhzui tlaka a ngaih avangin, July 17, 2015 khan Vigilance Secretary chu ACB-te a rang thei ang bera chhuitir turin a hriattir a ni.

He thil kal zelah hian Fisheries Secretary chuan Fisheries Director hnenah July 21, 2015 khan lehkha thawnin, NLUP Pilot Project cum Fish Culture Scheme chu tihtawp a nih thu leh, sangha chi supply-tu Zoram Fish Production Centre leh Mizofa Feed Seed Farm chu chhui chian an nih hma chu sum pe lo turin a hriattir.

John Vanlalchhuanga'n Chief Minister hnena lehkha a thawnah hian, NLUP hnuaia Fisheries department-in sangha chi supply tur an thlan danah thil fel lo awma a hria thu a tarlang a, "Tuna NLUP pawisa hmanga Fisheries department-in supply order May 15, 2015-a an pek chhuah nen benificiary-te'n vawi hnih sangha chi dawng tur an nih laiin, finfiah theih chinah chuan vawi khat chauh kumin hian kan la dawng a ni," a ti.

John Vanlalchhuanga tarlan danin, Aizawl district bikah chuan sangha chi sem zo vek tawh angin supplier-te'n bill an thehlut tawh a; chutih laiin, supply order-a a inziah angin a hmunah sem a ni lo. NIB secretary James Lalrinchhana'n Fisheries Director hnena lehkha a pek, Mizoram puma NIB-in common carp fish seed rate atana a pawm Rs. 4.40 tih chu thu dik lo a ni a, Serchhip leh Champhai district bika tana tih a ni.

Hetih lai hian, March 10, 2015-a Chief Secretary hoa SPAB ṭhukhawm chuan, common coap milimetre 100 chu a to berna Saiha district-ah Rs. 1.70 ni turin an bituk a; hemi rate hian Fisheries department hnuaia sangha chi supply zawng zawng, NLUP leh RKVY-te pawh a huam vek a ni.