Citizenship Amendment Bill kan duh lo - MPCY

MPC party ṭhalai chuan thu­chhuah siamin, sor­kar laipuia BJP kaih­hruai sorkarin Parliament-ah Citizenship Amendment Bill put luh tuma hma­lakna an kalpui mek chu an duh loh thu an tarlang.

MPCY chuan, "Citizenship Amendment Bill hi Mizoram tan a him dawn loh avangin assimilation kawngkapui hawnna turah kan ngai a, kan duh lo tak zet a ni," an ti a; Bangladesh aṭanga Chakma foreigner Mizorama lutte Mizoram tana harsatna lian zawk thlentu an nih theih phah dawn avangin an dodal thu an sawi.

Mizorama political party leh NGO zawng zawngte'n inthuruala an do a ṭul thu sawiin MPCY chuan, "Chakma foreigner-te duhthála kan rama an lo luh theihna tur Citizenship Amendment Bill Parliament-a pharh tura ruahmanna awm mek hi kan dodal tlân a, kan ram leh hnam himna tura ke kan pên tlân a ngai tak zet a ni," an ti.