KHAWTHLIR

City bus dan khap
Traffic SP chuan thupek chhuahin, Aizawl khawpui chhunga city bus stand/stop zawng zawngah city bus lut tur leh chhuak tur dîpdâlin lirthei leh thil dang park/dah phal a nih loh thu a tarlang a, "Hetianga city bus stand/stop tibuai ­zawnga lirthei leh thil dang park/dahte khauh zawkin an chungah action lak a ni ang," a ti.

Meizial man
Serchhip Anti-Tobacco Squad leh Serchhip Legal Metrology department ṭangkawp chuan, Nilaini zan khan Serchhip khaw chhunga dan phal loha meizial (foreign cigarette) zuarte an dap a; Myanmar aṭanga tawlh luh meizial eng emaw zat an man. Cigarette an mante hi a vaiin carton 400 a ni a, Farstar leh Winbody-te an ni hlawm.

EDS zirtir
NEDP hnuaia Entrepreneurship Development Scheme (EDS) hmalakna inzirtirna hun nimin khan Parish Hall, Kolasib-ah buatsaih a ni a, Kolasib DC Dr Arun T-a'n a hmanpui. EDS hnuaiah hian project thehluh theih a ni a, a ti ṭhate chu sorkarin bul ṭanna tur a pe dawn a ni.

Nuai 276 man acid man
Aizawl Customs department mite chuan an thudawn bawhzuiin Nilaini khan Vairengte Zalen Vengah dan lova Ascorbic Acid lak luh, Rs. 2,76,00,000 an man. Acid hi buara ip 690 ah thun a ni a, ip khat hi kg. 50 zel niin, neitu hi hriat a la ni lo.

Zirtirtu training
Mizoram University, RMSA leh TISS, Mumbai-te chuan Mizoram high school-a Mathematics, Science leh English zirtirtute tan DIET, AIzawl leh NIT Computer Laboratory-ah 'Teacher Professional Development Course' an buatsaih mek a, naktukah zawh a ni ang.

ODF Week
Khawlaia inthiar awm lohna tura hmalakna kal zelah, nimin khan Kolasib Diakkawn YMA Hall-ah 'Freedom from Open Defecation Week' hman ṭan a ni a, Kolasib DC Dr Arun T-a'n a hawng.