Quarantine-a awmte'n sum awm zat leh an thil dawn a inmil lo an ti

Tun hnaia hmarchhak state hrang hranga Mizo tangkhang lo haw, Aizawla quarantine centre-a awm mi ṭhenkhat chuan sorkarin ni khata an ei leh in atana sum a ruahman zat leh ei leh in tur an dawn chu a inmil loah an ngai.Quarantine centre-a awm mi pakhat chuan, May 1, Zirtawpni aṭanga quarantine centre-a an awm hnuah ṭum khat arsa hrang hnih an hmeh bâk chu dâl leh alu chiah an hmeh char char thu nimin khan Vanglaini palai a hrilh a, "Zing leh tlaiah chaw ei tur min pe a, chhûnah thingpui leh biscuit pathum min pe ṭhin a, ṭum khat chu chow min pe ve tawh," a ti.

Ni khatah mi pakhat tan sorkarin Rs. 300 a ruahmana an hriat thu sawiin qua­rantine-a awm mek chuan, "Thil ṭha tak ei kan beisei a ni lo a, a ngai reng ringawt kan dawng a, chu bakah a pawisa zat kan hre ve reng si," a ti a; sum ruahman zat ngaihtuahin, an ei ṭhin aia ṭha deuh ei thei tura an inngaih thu a sawi.

Disaster Management & Rehabilitation department hotute chuan Vanglaini palai zawhna chhángin, State Disaster Respond Fund sum aṭangin quarantine centre-a awmte ei leh in atan mi pakhat tan ni khat zelah Rs. 300 hisápin DC-te hnenah sum an pek chhuah thu an sawi a, "DC-te'n an district chhunga mi ṭheuh an buaipui a ni," an ti.

Hetih lai hian, qua­rantine centre pakhata awm chuan an awm dan chu him loa a hriat thu Vanglaini palai a hrilh a, "State hrang hrang aṭanga hawte pindan (room) pakhatahte min dah a, inthiarna leh tui in turte min hman ṭâwmtir a ni. Kan awmna state-ah ni 30 chuang kan táng a, Covid-19 symptom kan nei lo a, kan rawn haw hnuah min endik leh a, Covid-19 hluarna state-a mite nen awm khawm hi a him lo hle a ni," a ti.

Vanglaini-in thlalak a dawnah Aizawl leh Lawngtlai quarantine-na hmuna chaw dawn hi a inang lo hle a ni.