Covid-19 vei enkawl a hautak Hmai tuamin i inveng ang u - IMA Secretary

Indian medical Association (IMA) Mizo­ram state branch secretary Dr Chawng­lungmuana chuan, Covid-19 vei pakhat enkawl pawh a hautak thu sawiin, hripui lêng mek damdawi leh invenna tur (vaccine) hmuh chhuah a la ni lo a, fimkhur taka invèn chu a pawimawh ber thu leh chumi atan chuan hmai tuamin awmzia a neih thu a sawi.

Vanglaini palai zawhna chhangin Dr Chawnglungmuana chuan, "Covid-19 enkawlna damdawi leh invenna vaccine hmuh chhuah a la ni lo a, Covid-19 vei mi pakhat enkawl hautak dan en hian kan ramah an awm belh a hlauhawm hle. Tun thlenga kan la him hi thu kan âwih vang a ni a, tihdam aia invên pawimawhzia a chiang a ni," a ti.

IMA secretary chuan, hripui léng kai belh Mizoramah an awm loh nan a invenna kawngah mipuite inthlahdah lo hrâm turin IMA-in an duh tih sawiin, "Chumi atan chuan loh theih loh thila kan lèn chhuah emaw, damlo kan kan emaw, damdawi-ina kan kal a ngai a nih chuan hmai tuamna (face mask) i hmang ṭheuh ang u," a ti a; hmai tuamna hmangtu an tam hnuah hri léng dang hritlang áwm ná leh pneumonia vei an tlem phah hle tih a sawi.

IMA Mizoram Secretary chuan, hmai tuam chu hripui léng laka invên nan a ṭangkaizia khawvel leh Mizoramah a lang chiang tawh nia sawiin, "Covid-19 lakah hian a vuah ve lo aiin thui tak min veng thei. Ning loin, nun dan phungah neih tum zawkin face mask hi kan khawtlang a hrisel zual zel zawk nan hman i uar sauh sauh ang u," tiin mipui a sáwm a ni.