KHAWTHLIR

Aizawlah leimin
Nimin tlai khan Saron Veng leh Tuithiang inrînaah lei a min leh a, Chhinga Veng-Bethlehem Veng kawngpui a hnawh pin avangin lirthei tan kaltlang theih a ni lo. Nimin tlai vek khan Ramhlun Venglaia Lalbiakliana Filling Station chhakah lei a min a, filling station ṭhenkhat lai a tihchhiat bakah, taxi pakhat a delh chhia a ni.

MPSC Secretary
Mizoram Public Service Commission (MPSC)-a deputation-a Secretary hna thawk mek Lalzirmawia Chhangte chu a deputation hun a tawp hnuah August 1, 2017 khan July 31, 2018 thleng thawk chhunzawm turin a hun pawhseisak a ni.

Bio-Fuel Day
Mizoram University-a Department of Management leh National Yuva Cooperative Society (NYCS) ṭangkawp huaihawtin, August 10-a World Bio-Fuel Day pualin nimin khan MZU Guest House conference hall-ah, 'Awareness programme on bio-fuel' hman a ni.

Tiau lei siam
Mizoram leh Myanmar inkalpawhna, Zokhawthara Ṭiau lei chu zawh ngam loh khawpa a chhiat tawh avangin July 31, 2017 aṭang khan Mizoram PWD-in thawm ṭhat hna an thawk a, August 10, 2017 khan an siam zo a ni.

Computer sem
Rashtriya Gram Swaraj Abhiyan scheme hnuaia tualchhung inrelbawlna tihchak nana village council-te thuam chakna turin, State Institute of Rural Development & Panchayati Raj chuan nimin khan Aizawl South-III huam chhunga V/C pakuate hnenah computer leh printer pakhat ṭheuh an sem.

Kângmei ven
Kolasib District Fire Prevention Committee chu nimin khan an chairman Dr Arun T, Kolasib DC hoin DC pisa conference hall-ah an ṭhu a; kângmei veng ṭha ber lawmman Rs. 50,000 an dawn hman dan tur rêlin, kângmei ven inzirtirna leh inhrilhriatna a zau zel theih nana hma latute hnenah an hmalak zelna atan pek ni se, an ti.