Kolkata-a Covid-19 vei Mizo pa a thi Sorkar dan angin Kolkata-ah hâl a ni
AMRI Hospital, Kolkata-a chi kawng leh tonsil cancer vanga enkawl lai H Rohmingliana (73), Vairengte chu May 3, Pathianni zan dar 7:30 khan a thi a, Covid-19 a vei tel tih May 1, 2020-a hmuh chhuah a nih avangin a ruang hi Mizoramah hawpui theih a ni lo a, nimin khan Kolkata-ah hâl a ni.
Thu dawn danin, H Rohmingliana hi November 2019-ah chi kawng cancer a ni tih hriat niin, February 2020-ah tonsil cancer a ni tih AMRI Hospital, Salt Lake-ah hmuh leh a ni a, March thla tìr lamah clot (deep vein thombosis) natna a nei tih hmuh leh a nih avangin March 16-ah a khûp hnuaiah a ke pahnih tan a ni.
April 18-ah damdawi-in aṭangin a chhuak a, April 21 aṭangin khawsik a neih avangin April 30-ah Dhakuria, Kolkata-a AMRI Hospital-ah admit leh a ni a, swab sample endik a nih hnuah Covid-19 a vei tih May 1 khan hmuh chhuah a ni. Covid-19 a vei tih hmuh a nih hnuah ICU-ah enkawl nghal a ni a, May 3 zan khan a thi ta a ni.
Kolkata Mizoram House-a assistant resident commissioner Jacob Lalawmpuia'n Vanglaini palai zawhna chhanga a sawi danin, H Rohmingliana ruang hi sorkar laipui thuchhuak angin, nimin khan Covid-19 vei thite halna hmunah hâl a ni. A ruang khawih tura tihte bakin an hmu thei lo a, damdawi-ina amah awmpui ṭhintu a fanu leh fapate pawhin quarantine centre-ah khung an nih avangin ruang hi an hmu thei lo.
H Rohmingliana ruang hi Mizoramah hawn theih a nih loh avangin nimin chhun dar 12 khan Vairengte-a an inah vuina inkhawm hman a ni a, Presbyterian Kohhrana Vairengte bialtu pastor-in a vui a ni. A vâp erawh chu an inah la hawn tura ruahman a nih thu an sawi.
Hriat theih chinah H Rohmingliana hi Mizo zinga Covid-19 vanga thi pathumna a ni. April 15, 2020 khan Shillong-a Bethany Hospital neitu Dr John L Sailo chu Shillong-ah a thi a, April 29 khan Yangon, Myanmar-ah Hmangaiha chu Covid-19 veiin a thi bawk.