Kângmei ven hapta hman dan tur rêl

Khawzawl District Level Committee on Fire Prevention ṭhutkhawm hmasa ber chu nimin khan an chairman H Lianzela, district bawrhsap hoin DC conference hall-ah neih a ni a, Fire Prevention Week chu February 10, 2020 aṭanga hman ṭan turin an rel.

Meeting chuan, Khawzawlah kângmei a chhuah loh nan mipuite fimkhur tura zirtirna, awareness campaign neih an rél a; district chhunga khaw hrang hrang V/C leh YMA-te hnenah kângmei laka mipuite fimkhur a ṭul thu uar zawka puangzar turin ngen ni se an ti.

Lo hâl hun hnuhnung state sorkarin a siam tawh, March 15, 2020 chu khauh taka kenkawh ni se, zâwm lo khua an awm chuan an chungah action lak ni se an ti a; an district-a kawng siam hna thawk mekte pawh kângmei tichhuak lo tura fimkhur tura ngen leh, lo hâl turte chu meilam ṭha taka sial tura ngen an rel bawk.

Meeting chuan, kângmei ven kawnga khaw hrang hrangte hmalak dan thlithlaia viltu tur District Level Monitoring Committee an din nghal a, kângmei ven hapta denchhenin sorkar leh mimal, a ti thei âwm deuhte hnenah office, in leh dawrah fire extinguisher dah tura ngen ni se an ti.

Ṭhutkhawmnaah hian Committee member secretary PC Lalchhandama, DFO Wildlife Division bakah, Khawzawla sorkar department hrang hranga hotu te, Khawzawl Joint V/C Chairman, Khawzawl Joint YMA President, Khawzawl Joint MHIP President leh MJA aiawhte an tel a ni.