Covid-19 Ordinance-in task force-te Mi man leh hrem tura thuneihna a pe

Covid-19 hri léng dona leh invènna atana Mizoram sorkarin dan (ordinance) thar a siam, The Mizoram (Containment and Pre­vention of Covid-19) Ordinance, 2020 chu May 3, Pathianni khan Mizoram Gazette-ah chhuah a ni a, hman ṭan nghal a ni. Dan tharah hian sorkarin Covid-19 chungchanga dan a siamte zawm lo hremna tur leh man theitute a chuang.

Covid-19 Ordinance-ah chuan, dan zâwm loa bawhchhiate man theitu leh pawisa chawitir theitu zingah sorkara thuneitu (enforcing official)-te bakah, state, district leh village/local level-a chairman, vice chairman leh secretary-te an tel. Pawisa chawitira hremte aṭanga sum hmuh chu ṭha taka chhinchhiah vek tur a ni a, register hranpa siama vawn tur a ni. 

Pawisa chawitir tura tihte'n pawisa an chawi/pek hma chuan hrèn theih a ni a, darkar 24 chhunga an pek loh chuan thla li chhung lung-inah tàntir theih a ni. Chutih rualin, hemi chungchang hi court phalna tel loa inman theih lohna (non-cognizable offence) niin, police-in phalna (warrant) tel loin a man thei lo a; bail theih a nih bakah, non-compoundable a ni bawk.

Ordinance-in thuneihna a pekte'n Ordinance kenkawhnaah rilru ṭha tak pûa hma an lakna emaw, mipui vantlang ṭhatna tura an chêtna emawte chu dan anga khin lêt leh thubuaia lâk theih a nih loh thu tarlan tel a ni.

India ram kalphungah ordinance hi Parliament/Assembly session neih loh laia Cabinet thutlukna anga President/Governor-in dan an siam ṭhin a ni a, dan puitling (act) a ni lo. Act ni tur leh hman zui zel theih tur chuan ordinance chhuah aṭanga thla ruk chhungin Parliament/Assembly session-ah pass a ngai a, pass a nih loh chuan a thi zui ṭhin. Thla ruk liam lo mah se, session neih ṭan aṭanga chawlhkar ruk chhunga pass a nih loh chuan a thi ṭhin bawk.

1.    Vantlang hmuna hmai tuamna vuah lo chu Rs. 100 chawitir theih a ni.

2.    Social distancing (ft. 6 aia hnaia awm khawm) zâwm lo chu Rs. 200 chawitir theih a ni.

3.    Vantlang hmuna chil chhâk chu Rs. 300 chawitir theih a ni.

4.    Thuneitute aṭanga phalna la hmasa loa sakhaw thil leh vantlang thila punkhawm huaihawtte chu Rs. 5,000 chawitir theih a ni.

5.    Phalna la hmasa loa state ramri pêla lut leh chhuak chu Rs. 5,000 chawitir theih a ni.

6.    Khung hran (quarantine) tur ni si, duh lo chu Rs. 3,000 chawitir theih a ni.

7.    Quarantine centre aṭanga awm hun chhung a zawh hmaa chhuak chu Rs. 1,000 aia tlem lo, Rs. 5,000 thleng chawitir theih a ni.

8.    Quarantine-a awm laia inkaihhruaina zawm duh loh vanga mi dang himna tiderthâwngtu chu Rs. 500 chawitir theih a ni.

9.    Central leh State sorkarin Covid-19 donaa inkaihhruaina a siam leh inkharkhip thupek a siamte zâwm duh lo chu Rs. 1,000 chawitir theih a ni.

10.    Covid-19 kai emaw, a kai rinhlelhte nihna leh chanchin pholang thei, an thlalak leh an chanchinte thuneitute phalna nei loa thehdarhtu chu thla thum chhung lung-ina tàntir leh 

Rs. 5,000 chawitir thlenga hrem theih a ni.