Khawzawl leh Saitualah District tihpuitlin phut nan total bandh huaihawt dawn

Khawzawl District Imple­mentation Demand Committee (KDIDC) leh Saitual District Implementation Demand Committee (SDIDC) chuan, district tihpuitlin phûtin total bandh an huaihawt dawn.

KDIDC chuan, district head­quarters atana Khawzawl puan tawh tipuitling tura sorkar an phût chungchangah sorkar aṭanga bawhzuina leh thu lawmawm an hriat loh avangin vawiin hian Khawzawlah total bandh an huaihawt dawn.

Thu dawn danin, vawiina Khawzawla total bandh huaihawt tur hi zing dar 5-ah ṭan tur a ni a, tlai dar 5 thleng a awh ang.

Total bandh chhungin Khawzawlah dawr, sorkar pisa leh zirna-inte hawn an phal dawn lo a, lirthei tan Khawzawl paltlang theih a ni dawn lo. KDIDC chuan, boruak duhawm lo a thlen lohna turin khualzinte leh lirthei khalhtute chu bandh huaihawt chhungin Khawzawl paltlang tum lo turin an ngen a ni.

SDIDC pawhin Saitual district tihpuitlin phûtin naktuk Thawh­lehni hian Saitual khawpui huam chhungah zing dar 5 aṭanga tlai dar 5 thleng total bandh an huaihawt dawn a; bandh hian Saitual, Keifang, Rúlchàwm, Ruallung leh Sihfa-te a huam ang.

Total bandh neih tur hi SDIDC hruaitute Inrinnia ṭhukhawmin an rêl a; an thil phût tihhlawhtlinna atan na zawka sorkar nawr ṭha an ti a, July 31, 2017 aṭanga hmun hrang hranga flag var an tàr pawh lak thlak an rel a ni.

SDIDC chuan, Saitual district siam tura tel ve duh lo Thing­sulthliah tlangdunga khaw hrang hrangte chu a hmuna kalin thil awm dan hrilhfiah a, an thil phût chu duhpui tura sâwm an tum bawk.