Mizorama investment luh theih dan tur Governor hoin Mumbai-ah sawiho a ni

Indian Chamber of Commerce (ICC) chuan August 12, Inrinni khan Mumbai-ah, ‘Interaction with Hon'ble Governor of Mizoram’ an buatsaih a, Governor Lt. Gen. Nirbhay Sharma chuan Mahara­shtra sorkar aiawh leh investor kalkhawmte hmaah Mizorama investment hrang hrang a luh tam theih dan tur a sawipui.

Governor chuan, Mizo­ram chu India rama state rálmuang berte zinga mi a nih thu leh a hmun leh mipuiin an zir avangin invest-na hmun ṭha a nih thu a sawi a; Mumbai-a sumdawnna lian kalpuitu kal khawmte chu Mizoramah kal a, investment an tih theih dan tur a hmunah enfiah turin a sáwm.

Investor kal khawmte chuan, Mizoram tlawh a, Mizo mipuite zingah an sumdawnna kawnga thawhpui ve ngei an tum thu an sawi hlawm a ni.

Larsap ṭawiawmtu Planning secretary Dr C Vanlalramsanga chuan, Mizoram economy dinhmun leh investment tih theih hrang hrang a lem nen a sawifiah.

Sawihonaah hian Maharashtra official-te chu principal secretary Bijay Kumar-in a ho a; farmer association te, Mega Food Park enkawltu te, food processing industry neitu te, a hlâwma thei lei ṭhin company-te leh hotel, health sector leh banking sector aṭangtein mi eng emaw zat an tel.

Maharashtra sorkar hotute nen hian sawihona ṭha tak neiin, thawkho zui zel turin thu an dah a; Mumbai leh Aizawlah road show neih a, Mizoram leh Maharashtra-a sum­dawngte an thawhhona turin hmalak zui an rêl a ni.