Bualpui-ah Red Sandalwood man

Directorate of Revenue Intelligence (DRI) chuan August 11, Zirtawpni khan Bamboo Industry kudam hlui, Bualpui, Kolasib district-ah ram páwna hralh chhuah tur Red Sandalwood tum (log) 80 an man. A vaiin Rs. 89,69,450 hû vela chhût a ni.

Kolasib aṭanga thu dawn danin, Bamboo industry kudamah hian thla rei lo tê kal taah khan kudam neitu, Aizawl lama awm chuan kudam chahbi kawltu, Bualpui mi chu phone hmanga biain, kudama thil dah tur an awm thu hrilhin, kudam chu lo hawnsak turin a ti a ni. Kudam enkawltu hian a hawnsak bâk a hriatpui lo a, eng thil nge an dah tih a hriatpui lo niin a sawi.

DRI mite hian Red Sandalwood an man chu tum/tlâwn 80 a nih thu leh, India ramah lei phalna license nei an la awm loh avangin ram páwna thawn chhuah tur a nih ngei an rin thu an sawi. Red San­dalwood hi a rihna (weight)-a tehin hralh a ni ṭhin a, Bualpuia an man hi kg. 2562.7 niin, Rs. 89,69,450 hû vela chhût a ni.

Kudam neitu Aizawl lam mi tih hi DRI chuan tu nge a nih an la puangzar lo a ni.