PWD hnuaia kawng siam hnathawhah Revised estimate awm ngai mang lo

Mizoram PWD enkawl kawngpui laih leh kawngpui awm sa zauh hna, cheng nuai 100 chuang man chin an thawhah revised estimate a awm mang lo. Kawng siamtu contractor-te zinga Mizo an awm nual a, hnam dang an awm bawk.

RTI Act hmanga Vanglaini-in zawhna PWD-in an chhan danin, PWD-in kawng an siam, cheng nuai 100 man chung lam hna hrang hrang an thawha estimate belhkhawm chu Rs. 68,09,96,233.59 a ni a; chu'ng zingah chuan a tira sum ruahman (estimate) anga hna thawh a nih hnuah, estimate pangngai aia tama estimate ennawn (revise estimate) a awm lo. Kawng laih leh zauh hnate chu hun tiamah an zo deuh vek hlawm a, hun tiama zawh hman loh leh la thawh mek a awm nual.

PWD kawng siam zingah, Hualngohmun-Samtlang kawng km. 4.820-a thui chu Mizo contractor parukin an thawk mek a; contrtactor ṭhenkhat zawh hun tur a liam tawh laiin, ṭhenkhat thawh zawh hun erawh a la thleng lo. Contractor ṭhenkhat chu an hnathawhna tur hmunah luh a harsat rih avangin an thawk mumal thei rih lo niin PWD hotute chuan an sawi.

Hualngohmun-Samtlang kawngah hian KM Thanzuala'n hlawm khatna changin, estimate chu (agreement amount) chu cheng nuai 140 a ni a, Zoramchhana chan hlawm hnihna agreement amount pawh nuai 140 a ni. Hlawm thumna chu Thangpara'n thawkin, agreement amount nuai 141 a ni a, hlawm lina R Rokima thawh agreement amount chu nuai 145, F Lalmasawma chan hlawm ngana agreement amount chu nuai 137 a ni. Heng contractor-te thawh hun chhung tura bituk chu thla 12 a ni.

Aizawl-West Lungdar via Reiek kawng km. 37-a thui thawm ṭhat (strengthening and improvement of Aizawl-Reiek-West Lungdar road) hna chu CT Mawia, Kolasib-in a thawk a, agreement amount chu Rs. 1,09,556,547.29 a ni. December 30, 2014-a thawh ṭan niin, December 30, 2016-a zawh tur a ni a, mahse, March 20, 2017-ah thawh zawh a ni. He hnaah hian revise estimate leh re-revise estimate a awm lo.

Tlawng lui Reiek kaia lei dawh hna chu Sadguru Engineers & Allied Services Pvt.Ltd.-in an thawk a, February 23, 2017 aṭanga February 23, 2019 chhunga siam zawh tura tih a ni a, agreement amount chu Rs. 55,852,537 a ni. PWD hotute chuan, lei dawh hna hi a nghahchhan (foundation) siam ṭan a nih laiin tui lianin a tichhia a, chuvang chuan hna thawh a muangchàn phah niin an sawi.

Hna thawh hun tiam chhunga zawh hman tarlan zingah, Zokhawsang, Zemabawka Assam Rifles hmun panna kawng km. 3.078-a thui chu bituminous pavement hmanga siam a ni a, Vanthangpuia, Dawrpuiin a thawk. Agreement amount chu Rs. 2,39,74,594 niin, revised estimate a awm lo.

JNNURM hnuaia Vaivakawn leh Mizoram University inkar kawng, km. 10-a thui zauh leh siam hna pawh hun tiam thla thum chhungin zawh hman a ni a, estimate ennawn a ni lo. He kawng hi GP Projects Ltd., Silchar-in an thawk a, agreement amount chu Rs. 1,57,91,060.59 a ni.

Thawh hun chhung tura bithliaha zawh hman loh zingah Aizawl City Ring Road (Sihhmui-Mizoram University) chu thla 12 chhunga zawh tur a ni a, mahse, JNNURM scheme chu sorkar laipuiin a tihtawp avangin project hi tihtawp rih a ni. He hna hi Tantia Constructions-in an thawk a, km. 14.171-a thui niin, estimate amount chu Rs. 4,84,926,328 a ni.