A tahtawlin kawng kan chei zel - CM

Chief minister Lal Thanhawla chuan, Mizorama kawngpuite chu a tahtawlin sorkarin a chei ṭhat zel thu a sawi.

CM Lal Thanhawla hian August 12, Inrin­ni zing khan Khatla East a tlawh a, veng chhung kawng tihzauh theih dan tur khawtlang hruaitute nen an en. Chief Minister chuan, Aizawl chu Kumpinu sorkarin a awp lai aṭang tawhin khawpui ṭhan zel dan turah ruahmanna ṭha a awm loh avangin a felfai tâwk lo tih a sawi a, "Mipui mamawhna vang leh a pawimawh êm avangin kawngpui tihlen ngaite sorkarin a tahtawlin a chei ṭha mek zel a ni," a ti.

Sorkar tana hmalak tiphûrawm lotu chu mi duhám leh mi dangte hmakhua miah ngai loa lirtheite kawngpuia dah ṭhinte an nih thu sawiin CM Hawla chuan, "Tlangram khawpui danga mite aiin Aizawl khaw chhunga kawngpuite a tê bik lo," a ti a; lirthei lei dawna garage neia inchhál, lirthei neih hnua kawngpuia dah leh site chu an hnawk tak zet tih a sawi.

Lal Thanhawla chuan, Chin Hills state a tlawh ṭumin Mizo khuate entawn tlak a tih thu a sawi a, "Khawtlang tana ṭhahnemngaihna kawngah te, Mizo tlawmngaihna, rilrua vantlang thil enkawl kawngah te, Duhlian ṭawng a nihna anga humhim leh chhawm nun kawngah leh kawng dang tam takah Mizoram chhunga khua leh veng mipuite'n tluk lohna kan nei a ni," a ti.

Chief Minister hi minister Lal Thanzara, PWD engineer-in-chief Vanlaltluanga, chief engineer Henry Lalmuankima leh UDPA direc­tor Joseph Lalramsanga ten an ṭawiawm a ni.