Speaker hoin MLA-te'n Covid-19 an sawiho A ṭul anga sorkar puihbawm an inhuam
Mizoram Legislative Assembly-a legislature party hrang hrang aiawh MLA-te chuan Assembly speaker Lalrinliana Sailo hoin a pisaah Covid-19 chungchang an sawiho a; a ṭul ang zela sorkar hmalakna puibàwm tur leh mipui harsatna sukiang tura hmalak zel an inhuam thu an sawi.
Lalrinliana Sailo chuan, Lok Sabha speaker Om Birla hoa state hrang hrangin video conference an neih chungchang a sawi a, "State hrang hranga legislator (MLA)-te'n Covid-19 chungchang an inhrilh zung zung theih nan leh hmalak dan tur inhriat pawhna turin Parliament-ah leh state assembly hrang hrangah control room siam ni se tiin thu tihtluk a ni. Mizoram Legislative Assembly pawhin thutlukna hi zâwmin, Covid-19 pual control room a siam ve nghal a ni," a ti.
Legislature party hrang hrang aiawhte chuan, Covid-19 léng mek leh sorkar hmalaknate an thlir a, sorkar hmalakna bakah, kohhran, tlawmngai pawl, task force-te hmalakna leh mipui thlawpna chu lawmawm an tih thu te, a ṭul ang zela sorkar hmalakna pui tur leh mipui harsatna sukiang tura hmalak zel an inhuam thu an sawi. Mipuite chu fimkhur chunga thlamuang taka awm turin an chah a ni.
Sawihonaah hian deputy speaker Lalrinawma, ZLP aiawhin opposition group leader Lalduhoma, CLP aiawhin Zodintluanga te bakah, MLA dang panga - Vanlalhlana, Dr BD Chakma, Lalchhuanthanga, L Thangmawia leh Lalrindika Ralte te an tel.