KHAWTHLIR

Beihpui thlak
Synod Revival Committee bultuma 'Ram chu Lalpa ta a ni' tih thupuia hmanga ram pum huapa revival beihpui thlak thawh hnihna chu pastor bial 70-ah neih leh a ni. Beihpui thlak hi nakkum MLA inthlan lo awm tur thlir chunga ruahman a ni.

Jubilee lawm
Roman Catholic Kohhrana St. Lawrence Koh-hran chuan, nimin khan kum 25 (silver jubilee) tlin an lawm a, Aizawl bishop Most Rev. Stephen Rotluanga'n a hmanpui. Jubilee lawm hi August 4, 2017 aṭangin Novena ṭawngṭainaa ṭan a ni. St. Lawrence Kohhran hi February 23, 1992-ah Mathew Arackal hoa din a ni.

In thiat
Tun hnaia ruahsûr nasa vangin Vanlaltluanga, Bairabi South in bul a min a, in chu luah zui ngam a nih loh avangin Inrinni khan khawtlangin an ṭhiahsak. Vanlal-tluanga in hi Tlawng lui kama awm a ni a, Tlawng lui kama awm in dang eng emaw zat pawh hlauhthawnawm leh ṭhiah ngai tura ngaih a awm nual tawh a ni.

Thisen pe
Inrinni Bethlehem Venglai Branch KṬP-in an din champha vawi 45-na pualin Synod Hospital tan thisen unit 56 an pe a, a petute mipa 45 leh hmeichhia 11 an ni. Hnahthial Bazar Bial ṬKP pawhin Lunglei Civil Hospital tan thisen unit 57 an pe a, a petute mipa 44 leh hmeichhia 13 an ni. Lungleia YMA Youth Hostel-a zirlai 17-te pawhin Christian Hospital, Serkawnah thisen unit 17 an pe bawk.

In kâng
August 12, Inrinni zan dar 6:30 vel khan KL Neihlaia (L) in Assam type, mi dang luah, Chhinga Venga mi chu a kâng a, bungrua chuh hman lohin a kâng ral. Thu dawn danin, in hi chhungkaw pathumin an luah a, a kan chhan hi electric current kal dik loh vang nia hriat a ni. Kângmei hnuhmate chu nimin khan khawtlangin hnatlangin an tifai a ni.

I-Day sawiho
Lunglei DC Lalzarmawii hoin tun hnai khan sorkar official leh tlawmngai pawl hruaitute'n DC conference hall-ah kumin Independence Day atana inpuahchahna an sawiho.

Lok Adalat
Kolasib District Lok Adalat chu Inrinni khan Kolasib District Court-ah an ṭhu a, thubuai 39 an ngaihtuah zinga paruk an chingfel. Thubuai ngaih-tuahnaah hian leiba in-
ṭhìnna aṭangin Rs. 49,017 an hmu chhuak.